Як змянілася з савецкіх часоў колькасць рэлігійных суполак у Беларусі
Праваслаўная царква — адзіная рэлігійная канфесія Беларусі, у якой за апошнія чатыры гады назіраўся істотны прырост колькасці абшчын.
У астатніх канфесій колькасць суполак альбо вырасла ў межах аднаго-двух (рымска-каталікі, хрысціяне веры евангельскай, хрысціяне-баптысты), альбо «закансервавалася» (стараверы, адвентысты сёмага дня, мусульмане), альбо скарацілася (лютэране, іудзеі, новаапостальская царква), пішуць «Беларусы і рынак»
Паводле бягучых даных, размешчаных на сайце ўпаўнаважанага па справах рэлігій і нацыянальнасцяў, за 2000-2024 гады колькасць праваслаўных суполак у краіне вырасла на 28. Праваслаўныя абшчыны забяспечылі асноўны прырост канфесійных структур, які ў цэлым склаў 30 прыходаў.
- Па стане на 1 студзеня 2024 года было зарэгістравана 1737 праваслаўных абшчын, якія знаходзяцца ў падпарадкаванні Беларускай Праваслаўнай Царквы. І гэта амаль палова абшчын, якія дзейнічалі на гэтую дату, ад усіх 25 існуючых у краіне канфесій, колькасць якіх склала 3419.
- Другое месца — у хрысціян веры евангельскай, усяго 526 суполак. У іх колькасць прыходаў за названы прамежак вырасла на 2.
- Таксама на 2 абшчыны стала больш у Рымска-каталіцкай царквы (500), якая займае трэцяе месца. Але ў апошнія тры гады рэгістрацый новых суполак не было.
Глядзіце таксама
Як змянілася колькасць рэлігійных прыходаў у параўнанні з БССР?
Thinkthanks.by удалося знайсці даныя па рэлігійных канфесіях у апошнія гады існавання БССР. Яны датаваныя жніўнем 1989 года.
Паводле дадзеных Савета па справах рэлігій пры Саўміне БССР, у рэспубліцы тады дзейнічала 1437 рэлігійных абшчын, якія адносіліся да 19 канфесій.
Праваслаўная царква таксама была дамінуючай у рэлігійных поглядах беларусаў. З таго часу па сённяшні дзень колькасць яе прыходаў павялічылася ў 2,3 разы.
Лідарам па зарэгістраваных новых суполках сталі хрысціяне веры евангельскай. З 1989 па 2024 год парафій у гэтым адгалінаванні пратэстантызму стала больш у 3,3 разы, і гэтая канфесія абышла рымска-каталіцкую царкву.
Адвентысты Сёмага Дня, хрысціяне Поўнага Евангелля і лютэране не прысутнічалі ў рэлігійным жыцці апошніх гадоў БССР. Яны, адпаведна, выціснулі з топ-10 па рэлігійных супольнасцях грэка-каталікоў (якіх у 1989-м было 9, а ў 2024-м — 16), хрысціян веры апостальскай (8 і 11) і крышнаітаў (5 і 6).