Еўрапарламент заклікаў прызнаць аднаполыя саюзы

Еўрапейскі парламент заклікаў дзевяць краін-членаў Еўрасаюза "разгледзець магчымасць прадастаўлення гомасэксуальным парам правоў сужыцця, зарэгістраваных дэ факта саюзаў і шлюбу", — паведамляе gaypress.eu.



8 верасня дэпутаты Еўрапарламента прагаласавалі ў падтрымку дакладу аб фундаментальных правах у Еўрапейскім Саюзе, у якім змяшчаюцца шэраг ЛГБТ-рэкамендацый.
 

У адной з ухваленых рэзалюцый адзначаецца, што "фундаментальныя правы ЛГБТ-людзей гарантуюцца з большай верагоднасцю, калі ў іх ёсць доступ да прававых інстытутаў, такіх як сужыццё, зарэгістраванае партнёрства або шлюб".
 

Еўрапарламент заўважыў, што "вітае той факт, што 19 краін-членаў у цяперашні час прадастаўляюць гэтыя варыянты, і заклікае іншыя краіны-члены вывучыць магчымасць рушыць услед па гэтым шляху".
 

На сённяшні дзень дзевяць краін-членаў Еўрасаюза не прызнаюць саюзы пар геяў і лесбіянак ні ў якай форме. Гэта: Балгарыя, Кіпр, Грэцыя, Італія, Латвія, Літва, Польшча, Румынія і Славакія.