Кампанія па зборы сродкаў на штрафы блогера Сяргея Пятрухіна заблакаваная

Блогеру паведамілі, што збор сродкаў на штрафы можа быць расцэнены як спроба ўхілення вінаватай асобай ад прызначанага пакарання.

На платформе MolaMola заблакаваны збор сродкаў на пагашэнне вялізнага штрафу, які суд Ленінскага раёна абавязаў выплаціць блогера Сяргея Пятрухіна.
Як распавёў «БГ» Сяргей Пятрухін, збор быў зачынены 5 мая. Ён атрымаў ліст ад сэрвісу MolaMola, у якім гаворыцца, што пры падрабязным разглядзе яго кампаніі была выяўлена яе неадпаведнасць бягучаму заканадаўству Беларусі ў частцы збору сродкаў на штрафы, бо «такая дзейнасць можа быць расцэненая як спроба ўхілення вінаватай асобай ад прызначанага пакарання» .
«У сувязі з гэтым мы вымушаны спыніць збор сродкаў», — гаворыцца ў лісце, атрыманым блогерам.
Па словах Пятрухіна, ён паспеў зняць грошы, якія яму пералічылі праз гэты сэрвіс.
Атрымаць аператыўны каментар у кампаніі, якой належыць MolaMola, 8 траўня «БГ» не ўдалося.

Разам з тым на электронную пошту рэдакцыі 6 траўня прыйшла копія ліста, які нібыта быў дасланы ў тым ліку і ўладальніку сэрвісу. Аўтар звароту патрабуе прыпыніць збор грошай для Пятрухіна, паколькі гэты штраф — пакаранне па крымінальнай справе.
Нагадаем, 18 красавіка суд прызнаў Сяргея Пятрухіна вінаватым у публічных паклёпе і абразе міліцыянтаў і прысудзіў да штрафу ў памеры 360 базавых (9 180 рублёў) у даход дзяржавы, а таксама абавязаў пакрыць маральную шкоду пацярпелым супрацоўнікам міліцыі (у агульнай складанасці 7 500 рублёў) і выдаткі на адваката.
Праз некалькі дзён пасля суда УУС Брэсцкага аблвыканкама заявіла, што грошы, якія пералічыць блогер міліцыянтам пасля ўступлення прысуду ў законную сілу, яны пералічаць падшэфным дзіцячым дамам.
Дзяржабвінаваўца прасіў для Пятрухіна два гады абмежавання волі з накіраваннем у выпраўленчую ўстанову адкрытага тыпу і штраф у 100 базавых.
Сяргей Пятрухін вядомы сваімі відэаролікамі на вострыя сацыяльныя тэмы. З 2018 году разам з блогерам з Бярозы Аляксандрам Кабанавым на YouTube-каналах «Народны рэпарцёр» і «YouTube-дэпутаты» асвятляе тэму будаўніцтва пад Брэстам акумулятарнага завода. За сваю актыўнасць блогеры неаднаразова прыцягваліся да адміністрацыйнай адказнасці. Іх затрымлівалі і штрафавалі на буйныя сумы. Аплачваць штрафы Пятрухіну і Кабанаву дапамагаюць людзі.
Паводле b-g.by