Камунальная аварыя ў Жодзіне: 60-тысячны горад застаўся без вады

У другой палове дня з кранаў у кватэрах жодзінцаў працягвала цячы брудная вада.

18 сакавіка ў 9:00 у Жодзіна адбылася аварыя на электрасетках. Раніцай «Жодзінскія навіны» са спасылкай на мясцовыя РЭС паведамілі: адбылося адключэнне размеркавальнага пункта на падстанцыі БелАЗа, якая сілкуе электрычнасцю большую частку горада, у тым ліку і водазабор «Паўночны». У выніку горад застаўся без вады, а некаторыя раёны яшчэ і без святла.

Па дадзеных выдання, у 9.58 электразабеспячэнне водазабору было адноўлена і на працягу паўтары гадзіны ён пачаў працаваць у штатным рэжыме.

Як паведамляе Ex-press.by, у сувязі з аварыяй галоўны ўрач Жодзінскага цэнтра гігіены і эпідэміялогіі Сяргей Канавалаў накіраваў дырэктару камбіната грамадскага харчавання Яўгену Лабану і кіраўнікам аб'ектаў грамадскага харчавання гандлю Жодзіна ліст з пазнакай «вельмі тэрмінова».

У лісце гаворыцца: «Усе ўстановы адукацыі, у тым ліку харчблокі, аб'екты грамадскага харчавання, гандлю неабходна забяспечыць бутыляванай вадой для арганізацыі пітнога рэжыму, падрыхтоўкі ежы. Харчаванне дзяцей і наведвальнікаў ажыццяўляць з аднаразовага посуду альбо арганізаваць харчаванне сухім пайком. Выкарыстанне вады з цэнтралізаваных сетак водазабеспячэння не рэкамендавана да атрымання здавальняючых вынікаў лабараторных даследаванняў вады».

Такая вада цякла на вуліцы Ракасоўскага ў восьмым мікрараёне ў 16.05.

Паводле «Салідарнасці».