Карпянкоў прапанаваў падзяліцца з Расіяй «досведам спынення беспарадкаў»

Унутраныя войскі МУС Беларусі гатовыя падзяліцца з Расгвардыяй сваім «досведам стрымлівання масавых беспарадкаў». Пра гэта заявіў намеснік міністра ўнутраных спраў — камандуючы ўнутранымі войскамі МУС Беларусі генерал-маёр Мікалай Карпянкоў.
Мікалай Карпянкоў разбівае шкляную вітрыну кавярні на Нямізе, 2020 год 

Мікалай Карпянкоў разбівае шкляную вітрыну кавярні на Нямізе, 2020 год 


Сёння Карпянкоў прымаў з працоўным візітам расійскую дэлегацыю на чале са статс-сакратаром — намеснікам дырэктара Расгвардыі генерал-палкоўнікам Алегам Плахім.

Намеснік міністра ўнутраных спраў Беларусі выказаў зацікаўленасць у перайманні расійскага досведу барацьбы з міжнародным тэрарызмам.

«У сваю чаргу мы таксама заўсёды адкрытыя і гатовыя падзяліцца досведам, у тым ліку па спыненні масавых беспарадкаў», — перадае ТАСС яго словы.

Падчас масавых акцый 2020 года Карпянкоў на чале супрацоўнікаў ГУБАЗіКа, які ён тады ўзначальваў, асабіста займаўся разгонам дэманстрантаў. Найбольш вядомае яго дзеянне — разбітая вітрына кавярні на Нямізе ў Мінску, куды забеглі пратэстоўцы.

Падчас візіту намесніка дырэктара Расгвардыі быў падпісаны план двухбаковага супрацоўніцтва на 2022 год. У ім запланаваныя сумесныя заняткі па агнявой і тактыка-спецыяльнай падрыхтоўцы з супрацоўнікамі САХРа «Рысь» (МУС РФ), наведванне вайсковых часцей, узаемны ўдзел у практычных семінарах, чэмпіянатах па мнагабор'і кінолагаў, спаборніцтвах і вучэннях ды інш.

Дарэчы, у чэрвені ў Беларусь чакаецца візіт кіраўніка Федэральнай службы войскаў нацыянальнай гвардыі РФ (Расгвардыі) генерала Віктара Золатава.

Паводле «Еўрарадыё».

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,
Больш цікавага на «Новым Часе»: