Кітайцаў, якія вяртаюцца з вакацый, адправяць у каранцін пад Радашкавічы

У дзіцячы лагер «Брыгантына» будуць звозіць студэнтаў і супрацоўнікаў індустрыяльнага парку «Вялікі камень», якія вяртаюцца пасля вакацый пасля кітайскага Новага года, паведамляе «Свабода».

Дзіцячы аздараўленчы лагер «Брыгантына» пад Радашкавічамі на Міншчыне стане базай для каранціннай ізаляцыі грамадзянаў Кітаю, якія прыбываюць у Беларусь, паведамляе Міністэрства аховы здароўя.

Сваю працу ён пачаў 7 лютага. Сюды будуць звозіць найперш студэнтаў і супрацоўнікаў індустрыяльнага парку «Вялікі камень», якія вяртаюцца пасля вакацый у сувязі з кітайскім Новым годам.

Медыцынскія абследаванні там весціся не будуць, двухтыднёвы каранцін патрэбен для таго, каб паназіраць за фізічным станам іншаземцаў з зоны эпідэміялагічнага бедства.

У адміністрацыі аздараўленчай установы карэспандэнту «Свабоды» факт прыёму кітайцаў пацвердзілі.

Паводле стану на 7 лютага, эксперты Міністэрства аховы здароўя праверылі пробы больш чым у паўтысячы грамадзянаў, якія прыехалі з Кітаю. Каронавіруса не выявілі.