Краязнаўца з Крэва звольнілі з працы за палітычныя выказванні

Вядомага ва ўсёй Беларусі краязнаўца Аляксандра Камінскага з мястэчка Крэва звольнілі з працы качагарам, паведамляе «Гарадзенская Вясна».

Пра гэта паведаміў сам Камінскі ў сваім акаўнце фэйсбуку:
"Чыноўніку прыйшліся недаспадобы некаторыя мае выказванні і ўчынкі, з прафесіяй качагара аніяк не звязаныя. А ў іх там, відаць, план па выяўленні “недабранадзейных” і іх “прэсаванні”. Не сказаць, каб было вельмі шкада той грашовай “мінімалкі”, якой я пазбавіўся. Больш перажываю за колішнюю непасрэдную начальніцу, якой цяпер будзе праблематычна знайсці надзейную замену".
Ён не верыць, што хтосьці з раённых чыноўнікаў хацеў прыстроіць на «цёплае» месца свайго пратэжэ — на вакантнае месца качагара цяпер не могуць знайсці ахвотных. На думку Камінскага, збіраліся пакараць яго за іншадумства, а атрымалася, што напярэдадні сезону халадоў горш зрабілі спажыўцам ды кіраўніцтву сельскага савету.

Раней Аляксандр Камінскі працаваў настаўнікам французскай мовы ў Крэўскай школе.
Камінскі як краязнаўца даследуе Першую сусветную вайну, ён аўтар шэрагу публікацый пра ваенныя падзеі 100-гадовай даўнасці, ад якіх пацярпела галоўная візітоўка Крэва — сярэднявечны замак, удакладняе Радыё Свабода.