«Паляванне на нас пачалося ў 2014-м, пасля Майдану...»
Маці распавялі пра сваіх сыноў-палітвязняў.
У Мінску прайшла прэсавая канферэнцыя форуму «Свабоду палітвязням» з
удзелам Яўгеніі Жалновай, маці Аляксея Жалнова і Раісы Валавік, маці
Іллі Валавіка.
Пра сітуацыю вакол палітвязняў з так званага пашыранага спісу, якіх вызнае форум, журналістам паведамілі таксама Павал Севярынец, Ганна Шапуцька і Вольга Мікалайчык.
Як адзначыў вядоўца прэсавай-канферэнцыі, на сённяшні дзень форум прызнае палітзняволенымі 11 чалавек. Гэта Міхаіл Жамчужны, Тарас Аватараў, Аляксей Жалноў, Ілля Валавік, Вадзім Бойка, Філіп Іваноў, Зміцер Цехановіч, Зміцер Паліенка, Ігар Комлік, Алесь Юркойць і Ірына Моцная.
«Заклікаем усіх беларусаў да салідарнасці. На іх месцы можа апынуцца кожны. Прапануем, каб умовай дыялогу была адсутнасць палітвязняў і спыненне рэпрэсій. Немагчыма, каб людзей саджалі за краты за іх нацыяналістычныя і патрыятычныя погляды», — адзначыў Павал Севярынец.
Яўгенія ЖалноваЯўгенія Жалнова распавяла пра свайго сына, які асуджаны паводле артыкула 364. Крымінальнага кодэксу («гвалт у дачыненні да супрацоўніка міліыі»).
Інцыдэнт адбыўся ў 2013 годзе ў Бабруйску. Аляксей Жалноў з бацькам зрабілі заўвагу міліцыянтам, якія прыпаркаваліся на ходніках, чым парушылі ПДР. Міліцыянты з ужываннем гвалту затрымалі бацьку і сына ды сфабрыкавалі супраць Аляксея Жалнова крымінальную справу.
Выглядае на тое, што міліцыянты такім чынам помсцілі бацьку Аляксея, які ў сацыяльных сетках актыўна выкрываў парушэнні закону з боку праваахоўнікаў. Спачатку хлопца пакаралі абмежаваннем волі, праз тры гады перавялі адбываць пакаранне ў Новаполацк, паставілі на прафілактычны ўлік. Неўзабаве распачалі крымінальную справу паводле артыкула 415 КК, інкрымінуючы парушэнне рэжыму. Пасля чарговага суда адправілі ў калонію ў Горках. Ужо ў калоніі, на трэці дзень знаходжання там адправілі ў шыза.
З канца студзеня адправілі ў ПКТ, дзе ён, паводле слоў маці, хутчэй за ўсё знаходзіцца дагэтуль. Тэрмін зняволення Аляксея Жалнова сканчаецца 21 кастрычніка.
Паводле Раісы Валавік, яе сын футбольны фанат і антыфашыст Ілля Валавік стаў ахвярай прыхільнікаў «рускага свету» ў сілавых структурах.
«Паляванне на нас пачалося ў 2014-м, пасля Майдану. Быў першы прэвентыўны арышт перад хакейным чэмпіянатам. У 2015 яго абкружылі людзі ў цывільным, збілі. Праз 10 дзён арыштавалі на працы і паспрабавалі абвінаваціць у парушэнні грамадскага парадку. Справа фактычна развалілася. Але сёлета справу аднавілі і ў сакавіку суд пакараў Іллю Валавіка паводле артыкулаў 339 («хуліганства») і 193 Крымінальнага кодэксу («кіраванне незарэгістраванай арганізацыяй») 10 гадамі калоніі».
Раіса Валавік
Ганна Шапуцька распавяла, што акрамя Аляксея Жалнова ў Горках адбываюць тэрміны зняволення таксама Міхаіл Жамчужны і хутчэй за ўсё Філіп Іваноў. Зміцер Цехановіч, паводле яе звестак, знаходзіцца ў Віцебску.
«Улада ўбачыла ў гэтых людзях тых, хто можа аказаць супраціў уладам у выпадку беларускага Майдану», — адзначыла Ганна Шапуцька.
Фота аўтара