Мінадукацыі пры ўдзеле Саўміна і адміністрацыі Лукашэнкі забараніла блогеру Дзім Дзімычу выступаць у школах

Блогеру Дзмітрыю Сіўчыку, вядомаму пад псеўданімам Дзім Дзімыч, забаранілі ўдзельнічаць у школьных мерапрыемствах. Адказ ад Міністэрства адукацыі апублікавала ў сваім канале гродзенская прапагандыстка Вольга Бондарава, піша «Наша Ніва».

У адказе на імя нейкай Алены Васільеўны можна ацаніць узровень, на якім прымалася рашэнне. У лісце гаворыцца, што Мінадукацыі па даручэнні Апарата Савета Міністраў Рэспублікі Беларусь разглядзела яе зварот, які «паступіў з Адміністрацыі Прэзідэнта Рэспублікі Беларусь».

«Па выніках разбору кіраўнікам устаноў адукацыі было ўказана на недапушчэнне ўдзелу ў мерапрыемствах забаўляльнага характару артыстаў, творчасць якіх можа негатыўна паўплываць на фарміраванне сістэмы духоўна-маральных і маральна-этычных каштоўнасцей у непаўналетніх», — гаворыцца ў адказе.

У лісце, падпісаным начальнікам Галоўнага ўпраўлення выхаваўчай работы і маладзёжнай палітыкі Віктарам Доўнарам, адзначаецца, што ў 2023 годзе меўся толькі адзін факт удзелу гэтага блогера ў школьным мерапрыемстве.

Чыноўнік напісаў, што гэта пытанне знаходзіцца на кантролі ў Мінадукацыі.

«20 кастрычніка 2023 года на нарадзе з намеснікамі начальнікаў галоўных упраўленняў адукацыі абласных выканаўчых камітэтаў дадаткова будзе звернута ўвага на недапушчэнне ўдзелу ў мерапрыемствах Дзмітрыя Сіўчыка», — дадаў Доўнар.

Паводле яго, Мінадукацыі «падтрымлівае меркаванне адносна таго, што вобраз Дзмітрыя Сіўчыка, які характарызуецца негатыўнымі выказваннямі і сацыяльна няўхвальнымі паводзінамі ў публічнай прасторы» можа «неспрыяльна адбівацца на развіцці і станаўленні асобы непаўналетніх».

Чыноўнік падзякаваў аўтару звароту за неабыякавае стаўленне да пытанняў выхавання дзяцей і моладзі.

Улады «абламалі» «інфаказачніцу» Бондараву, якая патрабавала закрыць аграсядзібу «Літоўка»

Дзіма Сіўчык — папулярны блогер. У яго ютуб-канала 6 мільёнаў падпісчыкаў, а ў тыктоку — 2 мільёны. Асноўная яго аўдыторыя — падлеткі.

Дзяржаўныя органы і прапаганда звярнулі на яго ўвагу пасля даносаў прарасійскай актывісткі Вольгі Бондаравай. Тая абуралася, што блогер адзяваецца ў ружовае, а ў некаторых жартаўлівых роліках быў у сукенцы, і вінаваціла яго ў прапагандзе ЛГБТ.

Пасля яе скаргаў з сайта «Еўраопта» знялі рэкламу з Дзім Дзімычам, а яго самога адправілі ў эфір да прапагандыста Рыгора Азаронка.

Пазней блогера-мільённіка выклікалі ў Міністэрства культуры. «Там мы пагаварылі наконт майго кантэнту, унеслі правільныя карэкціроўкі», — распавёў блогер у Інстаграме.