Міністар інфармацыі патлумачыў, як будуць ідэнтыфікаваць каментатараў у сеціве

Аляксандр Карлюкевіч распавёў, якім чынам будуць ідэнтыфікаваць тых, хто будзе пакідаць каменнтары на сайтах. І без мабільнага тэлефона пракаметаваць нешта не атрымаецца, піша «Радыё Свабода».

Міністр інфармацыі Беларусі Аляксандр Карлюкевіч у эфіры тэлеканала АНТ расказаў, якім чынам будуць ідэнтыфікаваць карыстальнікаў, якія пакідаюць каментары ў інтэрнэце.

«Нехта захацеў зрабіць той ці іншы каментар. Ён адпраўляе сваё пасланне на той ці іншы інтэрнэт-рэсурс і пакідае нумар тэлефона. Туды яму прыйдзе код», — патлумачыў Карлюкевіч парадак ідэнтыфікацыі карыстальнікаў праз тэлефонныя нумары.

Нумар тэлефона будзе відаць толькі адміністратарам рэсурсу, але ўладальнікі сайтаў павінныя будуць даваць інфармацыю сілавікам на запыт, дадаў Карлюкевіч.

Змены ў закон «Аб СМІ» набудуць моц з 1 снежня.

У верасні быў апублікаваны праект Палажэння аб парадку папярэдняй ідэнтыфікацыі карыстальнікаў інтэрнэт-рэсурсаў, дзе даваліся тлумачэнні, як чытачы сайтаў змогуць пакідаць каментары ў інтэрнэце.

Адзіны спосаб ідэнтыфікацыі карыстальнікаў на сайтах, указаны ў дакуменце, — праз абаненцкія нумары. Такім чынам, зарэгістравацца праз сацыяльныя сеткі ці электронную пошту будзе нельга.

Уласнікі інтэрнэт-рэсурсаў змогуць збіраць наступныя персанальныя дадзеныя карыстальнікаў:

• імя і прозвішча,
  
• пол, дату і месца нараджэння,
  
• адрас электроннай пошты,
  
• дата і час размяшчэння паведамленняў/каментароў на сайце,
  
• МАС-адрас прылады,
  
• IP-адрас.