Моладзь жадае ведаць

  Недзяржаўныя моладзевыя структуры жадаюць узяць удзел у абмеркаванні законапраекта «Аб асновах дзяржаўнай моладзевай палітыкі», які паступіў у парламент. Пра гэта лідэры розных недзяржаўных моладзевых структур заявілі падчас «круглага стала», які адбыўся ў Мінску ў мінулыя выходныя.  

Недзяржаўныя моладзевыя структуры жадаюць узяць удзел у абмеркаванні законапраекта «Аб асновах дзяржаўнай моладзевай палітыкі», які паступіў у парламент. Пра гэта лідэры розных недзяржаўных моладзевых структур заявілі падчас «круглага стала», які адбыўся ў Мінску ў мінулыя выходныя.

Арганізатарам мерапрыемства выступіла моладзевае крыло Аб’яднанай грамадзянскай партыі «Маладыя дэмакраты», а ўдзельнікамі былі прадстаўнікі арганізацый «Малады фронт», «Моладзь БНФ», ЛКСМБ, «Ініцыятыва», «Задзіночанне беларускіх студэнтаў», «Маладая Беларусь», Студэнцкая Рада, «Еўрапейскі моладзевы парламент», а таксама сябры Беларускага Хельсінскага камітэта. Пра тое, што законапраект, які датычыць моладзі, ужо знаходзіцца ў Палаце прадстаўнікоў, па словах аднаго з лідэраў «Маладых дэмакратаў» Міхаіла Пашкевіча, стала вядома з кароткага паведамлення ў дзяржаўным інфармацыйным агенцтве БЕЛТА ў канцы мінулага года. Як высветлілася, фармальна змест дакумента быў даведзены толькі да ведама афіцыйных моладзевых структур — БРСМ, піянерскай і скаўцкай арганізацый. Недзяржаўныя моладзевыя структуры нават не ведалі пра існаванне такога законапраекта. Як адзначыў Міхаіл Пашкевіч, за апошні тыдзень на ўсе яго спробы датэлефанавацца да Палаты прадстаўнікоў і атрымаць копію законапраекта ён чуў толькі адмоўныя адказы. Спроба знайсці тэкст законапраекта на афіцыйных парталах, куды адсылалі актывістаў, скончыліся безвынікова. «Самае цікавае, што нават метадыст апарату Палаты прадстаўнікоў кажа, што ў іх копія законапраекта толькі адна ў папяровым выглядзе, і нікому яны яе не пакажуць», — абураецца Міхаіл Пашкевіч. Па словах даследчыцы медыяпраектаў, магістра грамадскай палітыкі Ірыны Віданавай, сёння варта прыцягнуць да абмеркавання законапраекта не толькі ўжо арганізаваныя моладзевыя структуры, але і проста маладых людзей. Калі думаць пра нейкае дзеянне ў сувязі з гэтым законам, то вельмі важна патрабаваць публічнасці, лічыць Ірына Віданава. «Пасыл, на мой погляд, можа быць вельмі просты: тое, чаго моладзь адназначна вельмі не любіць, гэта калі ёй дакладна ўказваюць, як жыць і што рабіць. І вось тут мы маглі б сказаць маладзёнам: за цябе ізноў хтосьці вырашае, як табе жыць і што рабіць», — падкрэсліла эксперт. Што да саміх дэмакратычных моладзевых структур, то, на думку аналітыка Ліберальнага клуба, сябра групы маладых экспертаў у супрацоўніцтве з Навукова-даследчым цэнтрам Мізеса Яўгена Прэйгермана, сёння ім таксама трэба мяняць тактыку: максімум актыўнасці ў тых сферах, у якіх яны маюць пэўную кампетэнцыю, менш радыкалізму ва ўсіх іх дзеяннях. На думку Яўгена Прэйгермана, радыкалізм выглядае жахліва для людзей, якія толькі пачынаюць асэнсоўваць тое, што здараецца ў грамадстве. «А калі мы станем менш радыкальнымі, ва ўмовах сённяшняга становішча, у нас ёсць магчымасць стаць публічнымі», — лічыць маладзён. Як абгрунтаваў сваё меркаванне малады ліберал, «хочуць тыя людзі, якія зараз знаходзяцца пры ўладзе, ці не, але ёсць пэўныя чыннікі, якія падштурхоўваюць іх да таго, каб слухаць нас і рабіць тое, што больш-менш не тычыцца такіх ужо выключна палітычных аспектаў, але ж для нас важна». Прадстаўнік «Маладых дэмакратаў» Фёдар Масленнікаў нагадаў, што сёння ў дзяржаве рэалізуецца афіцыйная праграма «Моладзь Беларусі», якая, на думку актывіста, мае дэкларатыўны характар. Гэта праграма, як у ёй запісана, павінна падвышаць прэстыж атрымання адукацыі, там прадугледжаны праца з кадрамі па падвышэнню якасці адукацыі, выхаванне грамадзяніна-патрыёта, паляпшэнне ўмоваў працаўладкавання, удзел у сацыяльна-эканамічным жыцці краіны, дапамога маладым сем’ям і гэтак далей. «У прынцыпе, банальны набор слоў, які мы ўсе чулі і добра ведаем», — сказаў актывіст. Фёдар Масленікаў упэўнены, што прынцып, калі дзяржава распрацоўвае законапраект, а потым працуе на ўзроўні суб’екта кіравання ў дачыненні да моладзі, не ёсць самым лепшым дыялогам. «Тут трэба стварыць яшчэ і адваротную сувязь, і было б пажадана, каб моладзь магла хаця б ускосна ўдзельнічаць у распрацоўцы такіх законапраектаў», — мяркуе актывіст «Маладых дэмакратаў». Як адзначыў лідэр салігорскіх маладафронтаўцаў Іван Шыла, «другі шлях, які, на жаль, зараз вельмі папулярны — гэта ліць еўрапейскія слёзы і ўплываць канкрэтна на дыпламатаў, якія гэтыя пытанні ўздымаюць у кулуарных перамовах з рэжымам Лукашэнкі, і толькі такім чынам мы можам у парадак дня, які абмяркоўваецца з той жа намесніцай кіраўніка адміністрацыі прэзідэнта Наталляй Пяткевіч, унесці нашы прапановы». Як бы тое ні было, прадстаўнікі моладзевых арганізацый вырашылі з дапамогаю прафесійных юрыстаў (напрыклад, з БХК) дабіцца атрымання тэксту законапраекта, абмеркаваць яго ў сваіх структурах і сабрацца праз два тыдні, каб вырашыць, што рабіць далей.