«Мужчыны ў балаклавах забралі маму з дому». Суд адправіў на дапрацоўку справу эколага Ірыны Сухій

6 верасня старшыню праўлення грамадскага аб'яднання «Экадом» Ірыну Сухій забралі з кватэры яе 93-гадовай маці трое міліцыянтаў. Двое былі ў балаклавах. Родныя кажуць, у кватэры таксама правялі ператрус (або агляд). Сёння справу Ірыны, якая правяла ноч у ізалятары, разгледзелі ў судзе, матэрыялы вярнулі ў РУУС для ліквідацыі недахопаў. Ці адпусцяць Ірыну дадому, невядома, фармальна яе могуць утрымліваць яшчэ двое сутак.

Дачка Ірыны Ганна Воўк у сацсетках апісала, як затрымлівалі яе маму 6 верасня.
— Гадзіну таму пры мне і бабулі ў кватэры пачалі выломліваць дзверы і забралі маму ў Савецкае РУУС. Адзін без маскі і двое ў масках. Сказалі, што не затрымліваюць і пашпарт не патрэбны.
Пазней, калі Ганна паехала ў РУУС, яна даведалася, што ў кватэры праводзяць «ператрус» (магчыма, агляд, бо гаворка ідзе аб адміністрацыйнай справе. — Заўвага. TUT.BY). Забралі, паводле слоў Ганны, старыя кампутары, у тым ліку кампутар, які належыць ёй, а таксама мадэм.
— Ніякіх дакументаў нам не далі. Дакумент, які сведчыць асобу, перавернуты, быў паказаны на секунду. Сказалі, што міліцыя.
Ноч Ірына Сухій правяла ў ізалятары на Акрэсціна. Сёння ў судзе Савецкага раёна разгледзелі яе справу — вінавацяць ва ўдзеле ў «несанкцыянаваным масавым мерапрыемстве». Па словах дачкі Ірыны Сафіі Садоўскай, у пратаколе пазначана, што 3 верасня яе мама прыняла ўдзел у акцыі ў 18 гадзін, хоць у гэты час яна ўжо ехала на хутар. Як паведаміла Сафія ў сацсетках, матэрыялы адправілі начальніку Савецкага РУУС для ліквідацыі недахопаў.
— Маму пакуль не выпусцілі і не сказалі, ці выпусцяць, — удакладніла дачка. Па законе, адміністрацыйна затрыманых могуць утрымліваць да 72 гадзін, пасля чаго павінна быць рашэнне суда.
tut.by