На дабрачынным аўкцыёне за дамен реклама.бел прапанавалі больш за 200 млн. рублёў
Самым дарагім лотам трэцяга дабрачыннага аўкцыёну прэміум-даменаў у кірылічнай зоне .бел стаў дамен реклама.бел, за які прапанавалі 233 млн. 100 тыс. рублёў, паведамляе прэс-цэнтр hoster.by.
Таргі прайшлі з 6 па 8 ліпеня, разыграныя 190 даменных імёнаў.
Самымі дарагімі лотамі сталі дамены реклама.бел, таксі.бел і подарок.бел. Дамены таксі.бел і подарок.бел набралі
па 55,6 і 33,2 млн. рублёў адпаведна.
Агульная сума ставак склала 763 млн. 145 тыс. рублёў. У выпадку аплаты ўсіх выйграных даменаў карыстальнікамі сабраныя на аўкцыёне сродкі, за выключэннем стандартнага кошту рэгістрацыі даменнага імя,
будуць пералічаныя ў тры дзіцячыя дамы краіны: ДУА "Дзівінскі дзіцячы дом", УА "Асіповіцкая дзяржаўная спецыяльная агульнаадукацыйная школа-інтэрнат", ДУА
"Бярэзінскі раённы сацыяльна-педагагічны цэнтр".
Наступны аўкцыён прэміум-даменаў стартуе 27 ліпеня.
Сяргей Каралевіч, БелаПАН