Новы начальнік «вучэбкі» у Печах: Сваякі жаўнераў цяпер змогуць пабываць у казармах
Начальнік 72-га гвардзейскага аб’яднанага навучальнага цэнтру ў Печах Вячаслаў Будзік упершыню пасля свайго прызначэння пагутарыў з журналістамі. Будзік распавёў, што ў цэнтры правядуць паўторную атэстацыю афіцэрскага складу.
«З моманту майго ўступлення на пасаду былі праведзены наступныя мерапрыемствы: пераатэстацыя сяржанцкага складу – тыя, хто не прайшоў яе, адпраўленыя ў іншыя вайсковыя часткі, на іх месца падабраныя вайскоўцы, з якімі цяпер праводзяцца заняткі для таго, каб пасля прызначыць іх на пасады сяржантаў», — сказаў ён.
Акрамя таго, з афіцэрамі і прапаршчыкамі, якія адказваюць за выхаванне асабістага складу, праводзяцца кантрольныя заняткі, па выніках якіх будзе праведзена атэстацыя. У перспектыве плануецца ўстаноўка сістэм відэаназірання ва ўсіх воінскіх частках нашага цэнтра, — перадае БелТА словы Вячаслава Будзіка.
Пра тое, што ў Печы перавядуць новых сяржантаў, стала вядома 14 лістапада. Гаворка ішла аб 20 новых вайскоўцах, якіх адбіралі па ўсёй краіне. Яны павінны былі прыбыць у тым ліку ў 3-ю і 307-ю школы (дзе вучыўся загінулы жаўнер Коржыч). Паводле слоў Вячаслава Будзіка, кіраўніцтва навучальнага цэнтру стала «больш адкрытым».
«З першых дзён знаходжання вайскоўцам новага папаўнення дазволена мець зносіны з бацькамі. Сваякі маюць магчымасць пабываць у казарме, азнаёміцца з умовамі размяшчэння, побыту, сустрэцца з камандаваннем, атрымаць нумары тэлефонаў, па якіх яны ў любы момант могуць задаць пытанні, — адзначыў начальнік 72-га гвардзейскага абʼяднанага навучальнага цэнтру.
Аляксандр Лукашэнка прызначыў Вячаслава Будзіка на пасаду начальніка 72-га АНЦ у Печах 20 лістапада. Пасля гібелі салдата Аляксандра Коржыча ранейшае кіраўніцтва адхілілі ад працы. Следчы камітэт распачаў 15 крымінальных спраў па розных артыкулах Крымінальнага кодэксу: парушэнне статутных адносін, махлярства, перавышэнне службовых паўнамоцтваў. 10 фігурантаў зараз знаходзяцца за кратамі, яшчэ 5 чалавек праходзяць па справе як падазраваныя.