«Па патрабаванні КДБ». Звольніўся адзін з кіраўнікоў індустрыяльнага парку «Вялікі камень» пад Мінскам

З кітайска-беларускага індустрыяльнага парку «Вялікі камень» звольніўся першы намеснік кіраўніка адміністрацыі Ігар Ляшчонак. У яго заяве адзначаецца, што гэта зроблена «па патрабаванні КДБ».

«Яшчэ адзін доказ масавых звальненняў па "спісах" з Камітэта дзяржбяспекі, — піша тэлеграм-канал «МотолькоПомоги». — 9 сакавіка з індустрыяльнага парку «Вялікі камень» звольнены Ігар Ляшчонак. Не апошні чалавек. Самае важнае, што звальненне ўзгаднялася з прэм’ер-міністрам Раманам Галоўчанкам. А пра патрабаванне КДБ ён сам напісаў у сваёй заяве».

Што стала падставай для звальнення, былы топ-менеджар не ўдакладняе. Свае палітычныя погляды падчас прэзідэнцкай кампаніі публічна ён не агучваў.

Кітайска-беларускі індустрыяльны парк «Вялікі камень» створаны ў адпаведнасці з прэзідэнцкім указам ад 5 чэрвеня 2012 года. Мае статус асобнай тэрытарыяльнай адзінкі са спецыяльным прававым рэжымам на 50 гадоў. Знаходзіцца ў Смалявіцкім раёне, агульная плошча перавышае 100 квадратных кіламетраў.

Канцэпцыя індустрыяльнага парку — стварэнне новага «экагорада», у якім спалучаецца вытворчая, жылая, адміністрацыйная інфраструктура.

Рэзідэнтамі з'яўляюцца прыкладна паўсотні кампаній, большая частка — з кітайскім капіталам.

Паводле «Свабоды».