Падалося мала. Брата намесніка камандзіра палка Каліноўскага будуць судзіць па другой справе

Пра новы суд над Сяргеем Франчуком з Бабруйска стала вядома праваабаронцам.

Стрыечнага брата прадстаўніка штабу палку Каліноўскага Сяргея Франчука будуць судзіць другі раз запар.

Сяргей Франчук мае трэцюю групу інваліднасьці, яго ўжо асудзілі на тры гады калёніі за ўдзел у пратэстах. Цяпер будуць судзіць яшчэ і за абразу Лукашэнкі.

У Мінскім гарадзкім судзе 28 красавіка Франчука асудзілі на тры гады калёніі ва ўмовах агульнага рэжыму нібыта за распальваньне варожасьці, а таксама за арганізацыю і падрыхтоўку дзеяньняў, якія груба парушаюць грамадзкі парадак, альбо актыўны удзел у іх (ч. 1 арт. 342 Крымінальнага кодэксу).

Праваабаронцы паведамляюць, што 13 траўня ў судзе Бабруйскага раёну і гораду Бабруйска адбудзецца разгляд другой крымінальнай справы супраць Франчука — цяпер паводле арт. 368 КК («Абраза Лукашэнкі»). Працэс будзе весьці судзьдзя Вольга Серакова.

Сяргей Франчук — стрыечны брат намесьніка камандзіра палка Кастуся Каліноўскага Вадзіма Кабанчука. Франчук мае трэцюю групу інваліднасьці.

За што судзяць сваякоў каліноўцаў

Праваабаронцам «В*сны» стала вядома пра ціск на сваякоў намесьніка камандзіра палку Каліноўскага Вадзіма Кабанчука з боку беларускіх сілавікоў.

Як узгадвае «Св*бода», першай ахвярай ціску стаў 32-гадовы стрыечны брат Вадзіма Сяргей Франчук. Як паведаміла маці Вадзіма Таісія Кабанчук, яго забралі з кватэры бацькоў у Бабруйску, дзе ён жыў апошнім часам. 9 жніўня, калі бацькі Сяргея былі на лецішчы, 5 чалавек з мінскага АМАПу ўварваліся ў кватэру, ударылі Сяргея Франчука пісталетам па галаве, правялі ператрус, забралі мабільны тэлефон, ноўтбук і самога Сяргея.

Яму выставілі абвінавачаньне паводле арт. 342 Крымінальнага кодэксу Беларусі («Арганізацыя і падрыхтоўка дзеяньняў, якія груба парушаюць грамадзкі парадак, або актыўны ўдзел у іх»).

Сілавікі запісалі прымусовае відэа з Сяргеем Франчуком, дзе ён кажа, што ўдзельнічаў у акцыях пратэсту 2020 году і пісаў камэнтары ў «экстрэмісцкіх» тэлеграм-чатах. На відэа відаць, што лоб у Сяргея заклеены.

Таксама на допыт у КДБ выклікалі стрыечную сястру Вадзіма Кабанчука з мужам. У іх таксама распытвалі, што яны ведаюць пра Вадзіма.

Многія беларусы з пачатку вайны сталі на абарону Украіны, сфармаваліся полк Каліноўскага і полк «Пагоня», таксама беларусы ваююць у шэрагах УСУ. Па падліках штабу Святланы Ціханоўскай, на баку Украіны ваююць каля 1500 беларусаў.