Пераход «Мядзінінкай» на мяжы з Літвой дагэтуль закрыты. Пакістанец начаваў у нейтральнай зоне
Памежны пераход «Мядзінінкай» (з беларускага боку — «Каменны Лог») застаецца закрытым пасля таго, як беларускія памежнікі адмовілі ва ўездзе грамадзяніну Пакістана, які прыехаў па падробленых дакументах. Пра гэта піша літоўскае агенцтва BNS.
Фота VSAT
«Мужчына стаіць
на лініі сцяны побач з дарогай. Там ён пераначаваў, памежнікі далі яму вады,
прапанавалі ежу, а Беларусь працягвае яго не пускаць», — распавёў журналісту
выдання ў нядзелю прадстаўнік Дзяржаўная памежнай службы Літвы (VSAT) Гедрус Мішуціс.
Паводле яго слоў, сітуацыя каля пагранперахода нармальная, чэргаў машын няма.
«Памежнікі стаяць на пасту і накіроўваюць аўтамабілі ў іншыя пункты. Яны не чакаюць каля пункту пропуска. Колькасць грузавікоў у зонах чакання такая ж, як і ўчора раніцай», — заявіў Мішуціс.
«Мабыць, папярэджанні аб сітуацыі на пункце спрацавалі», — дадаў ён.
Нагадаем, у суботу каля 13:00 перасячэнне мяжы з абодвух бакоў — з боку Літвы і Беларусі — было спынена на памежным пераходзе «Мядзінінкай». Уезд і выезд дазволены толькі маршрутным аўтобусам з літоўскімі нумарамі і дыпламатычнаму транспарту.
Літоўскія памежнікі вырашылі часова закрыць дзяржмяжу пасля таго, як беларускія ўлады адмовіліся прыняць грамадзяніна Пакістана, які спрабаваў уехаць у Літву па падробленых дакументах.
У пятніцу ўвечары літоўскія памежнікі пры праверцы дакументаў маршрутнага аўтобуса Мінск — Вільнюс выявілі, што адзін з пасажыраў прад'явіў меркавана падробленыя асабістыя дакументы.
Глядзіце таксама
Паводле слоў Мішуціса, грамадзянін Пакістана прад'явіў для праверкі падробленыя румынскія правы кіроўцы і румынскае пасведчанне асобы. У такіх выпадках фіксуецца адмова ва ўездзе асобы ў краіну і яго вяртаюць у краіну, з якой яна прыбыла.
«Аднак беларусы адмовіліся яго прыняць, чалавек не можа ўехаць у Літву, беларусы незаконна адмаўляюцца яго пускаць назад. Да гэтай гадзіны яны спрабавалі пагаварыць, паведаміць пра сітуацыю, але не пускаюць гэтага чалавека, хоць павінны былі б гэта зрабіць, — сказаў у суботу прадстаўнік VSAT. — Ён практычна сядзіць на сцяне, на лініі. Часам ён кладзецца на асфальт. У гэтым месцы не павінна быць чалавека, там звычайна вялікі трафік, высокія патокі».
Паводле слоў Мішуціса, пасля таго, як замежніка не ўдалося вярнуць назад у Беларусь, было прынята рашэнне спыніць рух у абодвух напрамках.
У такой нявызначанай сітуацыі VSAT рэкамендуе
падарожнікам з і ў Беларусь выбіраць іншыя памежныя пункты.