Першакурсніца, якая апублікавала відэа пра загон на галасаванне: «Аднагрупнікі пачалі мяне цкаваць»
У пятніцу, 15 лістапада, ля галоўнага корпуса БДЭУ адбылася акцыя супраць прымушэння да датэрміновага галасавання студэнтаў, паведамляе «Свабода».
Аліна Шмігель
Агітацыйны пікет пачаўся аб 11 гадзіне і доўжыўся каля 30 хвілін. Акцыя прайшла ў межах пікету кандыдата ў дэпутаты Міхася Варанцова. Акрамя яго, удзельнічалі яшчэ каля сямі чалавек, у тым ліку студэнты БДЭУ. Усе яны — актывісты «Моладзевага блоку».
«Мы тут робім агітацыйны мітынг, — кажа кандыдат. — У тым ліку супраць загону студэнтаў на датэрміновае галасаванне. Ужо каля 20% усіх выбарнікаў прагаласавалі датэрмінова. У тым ліку студэнтаў. Сюды мы прыйшлі таму, што ў інтэрнэт трапіла відэа з загонам студэнтаў. Хочам падтрымаць дзяўчыну, якая выклала ролік».
Акцыя «Моладзевага блоку» супраць прымушэння да датэрміновага галасавання студэнтаў
Акцыя «Моладзевага блоку» супраць прымушэння да датэрміновага галасавання студэнтаў
Варанцоў гаворыць пра відэа, апублікаванае на сайце Свабоды ў сераду, 13 лістапада. На ім відаць, як выкладчыца ўніверсітэту настойліва пераконвае студэнтаў прагаласаваць менавіта датэрмінова. А таксама паведамляе, што калі студэнты гэтага не зробяць, то ў яе могуць быць непрыемнасці.
Ролік зняла на свой мабільны тэлефон і даслала ў тэлеграм-канал Свабоды першакурсніца Аліна Шмігель.
Яна таксама прыйшла на пікет і расказала, навошта здымала відэа.
«Наша куратарка паклікала нас на куратарскую гадзіну, — расказвае Аліна Свабодзе. — Калі я пачула, што яна заве 18-гадовых дзяўчат, то зразумела, што яна збіраецца нам расказваць, і вырашыла здымаць відэа. Пасля чаго даслала яго вам.
Вы выклалі ролік, дазваніліся да куратаркі, да дырэктара інстытута. Навошта я гэта зрабіла, вырашыла апублікаваць відэа? Я хацела паказаць, што выкладчыца насамрэч не вінаватая, не яна гэта прыдумала. Яна нам сказала — зрабіце гэта (прагаласуйце датэрмінова. — Рэд.), каб мяне потым не тузалі. Хто яе павінен тузаць, каму гэта трэба?
Калі вы дазваніліся да Лапцёнка (дырэктар інстытуту Аляксандр Лапцёнак. — Рэд.), ён сказаў, што ніякіх распараджэнняў не было. Чаму так адбываецца, чаму ніхто не кантралюе такіх рэчаў? Гэта жахліва, што такое адбываецца ў дзяржаве. Ціснуць не толькі на студэнтаў, на выкладчыкаў таксама ціснуць зверху».
Нягледзячы на тое, што СМІ не называлі імя аўтаркі відэа, Аліну «вылічылі» амаль адразу.
Ля галоўнага корпуса БДЭУ
«Аднагрупнікі называюць мяне цяпер „пацуком“, — кажа яна. — Які ж я пацук? Я ж выканала свой грамадзянскі абавязак, у адрозненне ад іх. Узлаваліся на мяне. Кажуць, што калі ў іх праз мяне ўзнікнуць праблемы, то праблемы буду мець і я. Кажуць, што я падставіла чалавека. Я згодная, што гэта добрая выкладчыца, яна шмат для групы робіць. На яе проста ціснуць, і гэта жахліва. Я толькі гэта хацела сказаць. Я абураная тым, што так адбываецца. Не хачу, каб некага звальнялі з універсітэту цяпер. Справа не ў выкладчыках, справа ў сістэме».
Размоваў з прадстаўнікамі адміністрацыі ў Аліны пакуль не было. Затое дзяўчыну падтрымаў бацька. «Нават паціснуў мне руку», — кажа яна.