Польшча абвергла абвінавачанне ў парушэнні беларускай мяжы

Польшча зняпраўдзіла абвінавачанне ў парушэнні мяжы з Беларуссю. Увечары 12 красавіка польскія вайсковыя самалёты не выконвалі палётаў паблізу беларускай мяжы, паведаміла аператыўнае камандаванне польскіх Узброеных сіл.

«Праводзіцца пастаянны маніторынг паветранай прасторы. Ваенныя самалёты ўвечары 12.04 бягучага года не выконвалі палётаў паблізу дзяржаўнай мяжы паміж Польшчай і Беларуссю», — паведамляюць naviny.online са спасылкай на Twitter польскага ваеннага ведамства.

Міністэрства абароны Беларусі паведаміла, што ўвечары 12 красавіка неўстаноўленае паветранае судна парушыла беларускую мяжу і вярнулася ў Польшчу. У сувязі з інцыдэнтам у міністэрства быў выкліканы аташэ па пытаннях абароны пры польскай амбасадзе. Яму было заяўлена пра «неабходнасць правядзення разгляду па дадзеным факце і інфармавання беларускага боку аб яго выніках».