Праціўнікам акумулятарнага завода зноў не далі сабрацца на плошчы

Людзі па традыцыі прыйшлі на плошчу ў знак пратэсту, аднак праваахоўнікі пачалі іх выцясняць.

Днём 12 ліпеня ў Брэсце павінна было адбыцца традыцыйнае нядзельнае кармленне галубоў у знак пратэсту супраць акумулятарнага завода, пабудаванага ў некалькі кіламетраў ад горада. Аднак, як і апошнія тры нядзелі запар, супрацоўнікі праваахоўных органаў не далі людзям гэтага зрабіць. Паводле інфармацыі naviny.by, праваахоўнікі выцяснялі людзей з плошчы.
Па словах актывіста Дзмітрыя Бекалюка, каля 50 з 100 тых, хто прыйшоў, адправіліся да будынка гарвыканкама, дзе ў папярэднія два нядзелі праходзілі сустрэчы з кіраўніцтвам Брэста і Брэсцкага раёна.«У актавай зале гарвыканкама не было нікога з кіраўніцтва горада і раёна. А тыя, хто былі, сказалі, што не змогуць адказаць на пастаўленыя намі раней пытанні, у прыватнасці неабходнасці правядзення грамадскіх абмеркаванняў новай справаздачы аб уздзеянні на навакольнае асяроддзе акумулятарнага завода, — сказаў Бекалюк. — Пасля гэтага мы абмеркавалі на пляцоўцы ля будынка гарвыканкама свае далейшыя дзеянні да правядзення мясцовага рэферэндуму па заводзе».
Нагадаем, у нядзелю 5 ліпеня ў авальнай зале Брэсцкага гарвыканкама «акумулятаршчыкі» сустрэліся з кіраўніцтвам Брэсцкага райвыканкама. Каля двух гадзін яны абмяркоўвалі пытанне правядзення рэферэндуму па заводзе АКБ.
За тыдзень да гэтага, 28 чэрвеня, праціўнікі акумулятарнага завода сустракаліся са старшынёй Брэсцкага гарвыканкама Аляксандрам Рагачуком. Удзельнікі сустрэчы абмяркоўвалі тэхнічныя пытанні, сярод якіх — збор подпісаў, фарміраванне ўчастковых камісій. Кіраўнік горада прапанаваў замест таго, каб абмяркоўваць усе пытанні на плошчы і карміць галубоў, сустрэцца 5 ліпеня і працягнуць абмеркаванне ў канферэнц-зале гарвыканкама.
Дарэчы, да гэтага часу такія маўклівыя акцыі нязгодных праходзілі на галоўнай плошчы горада штотыдзень з сакавіка 2018 года.
b-g.by