Праваахоўнікі не пакідаюць у спакоі сваякоў забітай 14 гадоў таму журналісткі Веранікі Чаркасавай

Апошні раз сілавікі ў цывільным заявіліся ў кватэру, дзе пражываюць мама і айчым загінулай журналісткі «Салідарнасці» а 7 раніцы 3 кастрычніка. Яны быццам шукалі сына Веранікі Чаркасавай.

Званок у дзверы разбудзіў іх, распавядае айчым Веранікі Чаркасавай Уладзімір Мялешка.
— Нармальныя людзі ніколі так не званяць, — кажа мама журналісткі Дзіяна Цімафееўна. — А гэты званок ні з чым не зблытаеш. Званяць людзі, якія хочуць унесці неспакой або страх.
Уладзімір Уладзіміравіч адчыніў дзверы. На парозе кватэры стаялі двое ў цывільным. На пытанні, у чым справа і хто яны, адзін з візіцёраў паказаў пасведчанне на імя Мудрага Мікалая Мікалаевіча.
Па словах Уладзіміра Уладзіміравіча, другі госць не паказаў дакумент не прадставіўся. Бацькі Веранікі Чаркасавай не ведаюць, супрацоўнікамі якога праваахоўнага органа з'яўляюцца людзі, якія прыходзілі да іх.
— Яны сказалі, што шукаюць Антона Мікалаевіча. Я адказаў, што тут такі не пражывае.
Уладзімір Мялешка звяртае ўвагу на тое, што супрацоўнікі няправільна назвалі імя па бацьку сына Веранікі Чаркасавай.
Гаспадар кватэры сказаў, што размова скончаны, і зачыніў дзверы. Зноў пачуўся званок. Дзверы адкрылі, і супрацоўнік паставіў нагу так, каб яе немагчыма было зачыніць.
— Пыталіся, дзе Антон, прасілі даць яго кантакты. Усё, што мы ім далі, — назвалі нашы прозвішча, імя і гады нараджэння, — сказаў Уладзімір Уладзіміравіч. — Лічу, што ніякай размовы з імі быць не можа. Яны не ведаюць, куды ідуць, каго шукаюць. На нашы пытанні, з якой прычыны прыйшлі, сказалі, што іх паслала начальства.
Адзначым, што падобныя візіты праваахоўнікі наносяць бацькам Веранікі Чаркасавай кожны год, часцей за ўсё незадоўга да гадавіны забойства журналісткі.
— Сэнсу ў іх дзеяннях няма, — лічыць Дзіяна Цімафееўна. — Ім выдатна вядома, што мы нічога не ведаем, а калі б і ведалі, нічога не сказалі б. Мы старэем. Такі ўзрост, калі кожны найменшы стрэс дрэнна канчаецца. Яны на гэта і разлічваюць. Чым больш зробяць гадасць, тым больш залічыцца.
Уладзімір Уладзіміравіч дадаў, што сустрэча з праваахоўнікамі здароўя ім з жонкай не дадасць. Айчым Веранікі паўтара месяца правёў у лякарні: пасля чарговай хіміятэрапіі падхапіў пнеўманію і ледзь выскрабся.
— Гэта сістэма, — кажа Уладзімір Мялешка аб дзеяннях сілавікоў.
Журналістка «Салідарнасці» Вераніка Чаркасава загінула 20 кастрычніка 2004 года. Яе знайшлі ва ўласнай кватэры з 43-ма нажавымі раненнямі. Праз месяц пасля трагедыі грамадскасць шакавалі, абвясціўшы падазраванымі яе 15-гадовага сына Антона Філімонава і 63-гадовага айчыма загінулай Уладзіміра Мялешку. Вясной 2005 года падазрэнні з іх былі знятыя. Забойства дагэтуль не раскрытае.
Паводле gazetaby.com