Расійскі пісьменнік Дзмітрый Быкаў: Веру, што Фядута неўзабаве будзе вызвалены

Вядомы расійскі пісьменнік і публіцыст — пра лёс палітвязня Аляксандра Фядуты, а таксама пра будучыню Беларусі і Украіны.

— Я не бачу ніякіх абмежаванняў, якія б не дазволілі Расіі нешта зрабіць: сваіх не шкада, чужых — не страшна. У Бога яны, вядома, вераць, але шчыра думаюць, што ён на іх баку і хоча знішчэння ўсяго свету. Таму я цалкам дапускаю падрыў Запарожскай АЭС, на жаль, — цытуе Дзмітрыя Быкава «Салідарнасць» са спасылкай на ютуб-канал «Звычайная раніца». —

Між іншым, у Лукашэнкі, прынамсі, першапачаткова, у параўнанні з Пуціным былі некаторыя значна больш прывабныя рысы. Яго ж ніхто не прызначаў пераемнікам. Нейкі час ён вымушаны быў гуляць у папуліста, падладжвацца, прыслухоўвацца да парад таго ж Аляксандра Фядуты.

Згадаўшы пра беларускага калегу, Быкаў падзяліўся сваімі прагнозамі.

— Я ад душы жадаю Фядуту здароўя і хутчэйшага выздараўлення! Упэўнены, што хутка мы з ім працягнем нашы філалагічныя дыскусіі на волі. Не на радыё, а на волі ў самым такім экзістэнцыяльным сэнсе. Я веру, што ён хутка будзе вызвалены, і наогул з нагоды ўсёй гэтай канструкцыі — яна сама сябе разбурае вельмі хутка.

Вайна ва Украіне скончыцца грамадзянскай вайной у Расіі, у той ці іншай форме, у форме смуты хутчэй за ўсё. Наконт Лукашэнкі прагноз значна больш адназначны, і ўсе яго ведаюць самі.

Мне здаецца, што ён і фізічна, і маральна знаходзіцца ў вельмі дрэнным стане. Калі глядзіш на такога чалавека, нічога, акрамя жаху і спагады, не адчуваеш. Як сказаў Чэстэртан пра Уайльда: «Жудаснейшым за думкі гэтага чалавека быў толькі яго лёс», хоць Уайльд быў добры.

Тры гады за кратамі. Алексіевіч, Ціханоўская і іншыя вядомыя людзі звярнуліся да Ігара і Дар'і Лосікаў

Што тычыцца Лукашэнкі, то самадэструкцыя, самаразбурэнне гэтага рэжыму і гэтага чалавека ідзе апераджальнымі тэмпамі, хутчэй, чым у Расіі. І вельмі можа быць, што штуршком да разбурэння расійскай сістэмы будзе крах сістэмы беларускай.

Як хутка гэта адбудзецца, я не ведаю, таму што мы, паэты, прадказваем вектар, а не маштаб. Умоўна кажучы, кірунак, а не канкрэтыку. Кірунак, па-мойму, цалкам відавочны.

Я толькі жадаю вам, калі гэта здарыцца, міласэрнасці. Таму што спакуса помсціць будзе велізарнай. Мне адзін чалавек сказаў: вам нельга станавіцца міністрам, вы занадта злапомны. Вось я вам жадаю міласэрнасці, — падкрэсліў Быкаў.

Нагадаем, Аляксандр Фядута асуджаны на 10 гадоў зняволення па сфабрыкаванай справе аб «захопе дзяржаўнай улады».