Слуцк: заклікам ТБМ падтрымаць беларускую мову зацікавілася міліцыя

Праз тыдзень пасля пачатку перапісу старшыня Слуцкага ТБМ Зінаіда Цімошак вымушана тлумачыць міліцыі заклік да случчан пазначыць сваёй роднай мовай беларускую.

11 кастрычніка яе выклікаў у Слуцкі РАУС намеснік начальніка аддзела аховы правапарадку Мікалай Васіленка. Ён паказаў фотаздымкі, на якіх Зінаіда Цімошак 4 кастрычніка размаўляе з людзьмі на вуліцах горада. Міліцыянта цікавіла, ці не парушала гэтае мерапрыемства заканадаўства.
Па словах старшыні таварыства, прыдумляць ёй нічога не прыйшлося.
      — Я распавяла міліцыянту пра сур’ёзныя праблемы з роднай мовай у краіне і пра сваю прапанову да случчан як зусім натуральную з’яву падчас перапісу насельніцтва, — кажа грамадская актывістка. — Да таго ж асноўнай мэтай дзейнасці ТБМ як раз і з’яўляецца аднаўленне ў грамадстве стаўлення да роднай мовы як да нацыянальнай святыні, пашырэнне яе ўжытку ва ўсіх сферах жыцця, садзейнічанне забеспячэнню ёй рэальнага статуса дзяржаўнай мовы. На ўсялякі выпадак, пазнаёміла маёра Васіленку з адпаведнымі раздзеламі Статута ТБМ, а таксама са словамі міністра замежных спраў Макея аб неабходнасці папулярызацыі беларускай мовы.
Паскардзілася і на паўлегальны стан Слуцкага таварыства, адсутнасць памяшкання для папулярызацыі беларускай мовы.
      — На штотыднёвых занятках мы не размаўляем пра палітыку, толькі пра беларускую прыроду, пісьменнікаў і жыццё ў розных з’явах, — распавяла супрацоўніку РАУС Зінаіда Цімошак. — Інсцэніруем гісторыі з штодзённага жыцця беларусаў, але не маем магчымасці паказаць свае інсцэніроўкі людзям. Толькі і застаюцца вулічныя імпрэзы, за якія міліцыянты пасля выклікаюць у РАУС.
Напрыканцы жанчына пазнаёміла маёра Васіленку і з кнігай пра часы рымскага імператара Калігулу. Ужо нашто той меў шалёны нораў, але ж дазваляў вулічным артыстам свабодна выступаць на розных плошчах.У тое, што артыстам не патрабавалася асаблівага дазволу, маёр не паверыў.
З вынікамі правядзення праверкі «крамольнай акцыі» 4 кастрычніка Зінаіда Цімошак будзе азнаёмлена пазней.
— Думаю, што калі міліцыянты палічаць невялічкую і кароткую акцыю мясцовага ТБМ у абарону беларускай мовы за несанкцыянаваны пікет, які караецца па заканадаўству, то павагі ім ад насельніцтва за гэта не дадасца, — лічыць Зінаіда Цімошак. — Бо гэта надта хвалюючая і далікатная тэма, якая прыцягвае ўвагу незалежнай прэсы.
Па словах неабыякавай случчанкі, ніякіх акцый можна было і не ладзіць, бо паступае трывожная інфармацыя пра тое, што многіх людзей нават не апытваюць наконт выбару мовы. Да прыкладу, сёння яна атрымала такую інфармацыю ад некалькіх супрацоўніц слуцкай бальніцы.