Суддзя Грабоўская засталася беспакаранай
«У ходзе праведзенай праверкі фактаў грубых і непаважлівых адносін да ўдзельнікаў працэсу з боку суддзі суду Кастрычніцкага раёну г. Віцебску Грабоўскай І. В. ня выяўлена, падстаў для прыцягнення яе да дысцыплінарнай адказнасці ня ўгледжваю», — гэтак першы намесьнік начальніка галоўнага ўпраўлення юстыцыі Віцебскага аблвыканкаму Ігар Каржоў адказаў на заяву кіраўніка віцебскай абласной арганізацыі партыі БНФ Леанід Аўтухоў.
Суддзя І. В. Грабоўская
Леанід Аўтухоў прасіў галоўнае ўпраўленне юстыцыі ўзбудзіць дысцыплінарную вытворчасць у дачыненні суддзі Іны Грабоўскай, якая 25 сакавіка вынесла пастанову аб пакаранні яго і ягонага аднапартыйца Кастуся Смолікава адміністрацыйным арыштам за раздачу газеты і ўлётак у гандлёвым цэнтры. Названая пастанова, на думку палітыка, выносілася з парушэннем дзеючага заканадаўства, суд быў старонным і прадузятым, а суддзя не абараніла яго грамадзянскія і палітычныя правы ды законныя інтарэсы.
Леанід Аўтухоў адзначыў у сваёй заяве, што суддзя падчас працэсу паводзілася груба і непаважліва ў адносінах да прысутных у судзе грамадзян. Партыйны лідэр таксама прывёў шэраг фактаў парушэння ёю заканадаўства: выносячы рашэнне, судзьдзя Грабоўская не ўлічыла той акалічнасці, што ён знаходзіўся пад вартаю больш за 48 гадзін, што супярэчыць частцы 2 артыкулу 11.2 працэсуальна-выканаўчага кодэксу аб адміністрацыйных правапарушэннях; апроч таго, яму было дадзена не дастаткова часу на пошук адваката і падрыхтоўку сваёй абароны.
Таму, мяркуе сябра партыі БНФ, рашэнне, прынятае ў дачыненні да яго судом, з'яўляецца несправядлівым і не грунтуецца на законе, а суддзю Грабоўскую трэба было б пакараць. Аднак у галоўным упраўленні юстыцыі аблвыканкаму не прыслухаліся да аргументаў палітыка і адмовіліся задаволіць просьбу, выкладзеную ў ягонай заяве.