Сваякі Дзяніса Івашына больш за чатыры месяцы не атрымліваюць ад яго лістоў

Сваякі палітзняволенага журналіста Дзяніса Івашына не атрымліваюць ад яго лістоў ужо 127 дзён.

Пра гэта маці журналіста Людміла Івашына паведаміла на сваёй старонцы ў Facebook.

Паводле інфармацыі праваабаронцаў, Дзяніса Івашына абмяжоўваюць у ліставанні і неаднаразова змяшчалі ў штрафны ізалятар, піша REFORM.by.

Дзяніс Івашын быў затрыманы 12 сакавіка, у гэты ж дзень ператрусы прайшлі дома ў яго і яго бацькоў і ў 95-гадовай бабулі. Яго абвінавачвалі па артыкуле «Умяшанне ў дзейнасць супрацоўніка органаў унутраных спраў», а пазней перакваліфікавалі артыкул, цяпер яго абвінавачваюць у «здрадзе дзяржаве», яму пагражае да 15 гадоў пазбаўлення волі.

Івашын супрацоўнічаў з «Новым Часам» і з'яўляўся ўдзельнікам украінскай ініцыятывы «Інфармнапалм», вядомы сваімі расследаваннямі. Яго апошнімі матэрыяламі для «Новага Часу» былі артыкулы аб экс-супрацоўніках украінскага «Беркута», якія збеглі з краіны і ўладкаваліся на службу ў беларускія сілавыя структуры.