Трэцяя лінія мінскага метро прыме пасажыраў 7 лістапада

У Мінску сёння адбылося ўрачыстае адкрыццё трэцяй галіны метро. Праўда, для таго, каб на станцыю «Кавальская Слабада» прыехаў Аляксандр Лукашэнка, горад перад гэтым зачысцілі.

Як паведамляе блізкі да прэс-службы Лукашэнкі тэлеграм-канал «Пул Первого», беларускаму кіраўніку падарылі асаблівы праязны на метро.
Яшчэ ў чацвер у раёне станцыі «Кавальская Слабада» рыхтаваліся да ўрачыстага адкрыцця. На месцы бачылі чыноўнікаў, праяўлялі актыўнасць камунальнікі і міліцыя. З раніцы сілавікоў заўважылі таксама ў раёне станцый «Юбілейная плошча» і «Плошча Францішка Багушэвіча».
Для пасажыраў трэцяя лінія метро адкрыецца 7 лістапада ў 12.30.
У Мінску пакуль запускаюць чатыры станцыі Зялёналужскай лініі: гэта «Кавальская Слабада», «Вакзальная», «Плошча Францішка Багушэвіча», «Юбілейная плошча».
За «Кавальскай Слабадой» ужо будуюцца наступныя станцыі трэцяй галіны: «Аэрадромная», «Немаршанскі сад» і «Слуцкі гасцінец». Усяго на трэцяй лініі плануецца 14 станцый (з Курасоўшчыны ў Зялёны Луг праз цэнтр горада). На будаўніцтва першых чатырох станцый гэтай галіны сышло больш за пяць гадоў.
Паводле tut.by