У гадавіну чарнобыльскай аварыі ў Мінску затрымалі каля 20 чалавек

Нягледзячы на адсутнасць акцый з нагоды 35-й гадавіны аварыі на Чарнобыльскай АЭС, вечарам 26 красавіка ў Мінску былі затрыманы прыблізна 20 чалавек, паведамляе «БелаПАН» са спасылкай на даныя праваабаронцаў.

Затрыманні адбываліся ў раёне вуліцы Арлоўскай, дзе ў апошнія гады звычайна заканчвалася арганізаванае апазіцыйнымі сіламі шэсце «Чарнобыльскі шлях». Пасля 17.00 у гэтым раёне супрацоўнікі міліцыі сталі спыняць прахожых, правяраць змесціва іх сумак і заплечнікаў. Як мінімум адзін чалавек быў затрыманы ля Нацыянальнай акадэміі навук.

Двух чалавек, згодна з папярэдняй інфармацыяй, затрымалі ў іх кватэрах.

Сярод затрыманых — дзяўчына, якая жыве на вуліцы Мендзялеева і адзначала дзень нараджэння. Прыблізна 10 чалавек прыйшлі павіншаваць яе, у тым ліку з выхадам з каранціну ў сувязі з каронавірусам. Яны былі апранутыя ў ахоўныя касцюмы і, паводле інфармацыі праваабаронцаў, трымалі плакат. Удзельнікі віншавання былі затрыманыя сілавікамі ў цывільным.

Традыцыйная акцыя ў гадавіну трагедыі на Чарнобыльскай АЭС сёлета забароненая ўладамі. У Мінску было заўважана шмат спецтэхнікі.

Праваабаронцам таксама вядома аб правядзенні 26 красавіка не менш за 12 судоў па адміністрацыйных справах у сувязі з пратэстамі. Большасць фігурантаў атрымалі арышты.