У машыне затрыманага палітыка Кастусёва ў Шклове прабілі колы. Яго зяць з'ехаў з краіны

Зяць Рыгора Кастусёва Дзмітрый Антончык 23 красавіка пакінуў Беларусь. Цяпер ён знаходзіцца ў Варшаве.

Старшыня Партыі БНФ Рыгор Кастусёў быў затрыманы супрацоўнікамі КДБ у Шклове 12 красавіка. Пазней з’явілася інфармацыя, што ён у СІЗА КДБ у Мінску па так званай «справе аб дзяржперавароце», нагадвае TUT.BY.

13 красавіка ў Шклове ў зяця Кастусёва Дзмітрыя Антончыка правялі ператрус. Усяго ператрус працягваўся каля трох гадзін, у Дзмітрыя забралі кампутар, кнігі, CD-дыскі і «стары некамплектны страйкбольны прывад АКСУ».

Нядаўна Дзмітрый паведаміў у Фэйсбуку, што ў машыне Рыгора Кастусёва, якая стаіць каля пад’езда ягонага дома ў Шклове, прабілі ўсе колы. Пра здарэнне Дзмітрый даведаўся ад свайго бацькі.

Дачка палітыка Кацярына Кастусёва збіраецца падаць у Шклоўскі РАУС заяву на невядомых хуліганаў.