У Мінску на беларускай мове навучаюцца толькі 2% школьнікаў

У 15 установах агульнай сярэдняй адукацыі Мінска вучні займаюцца на беларускай мове. Такую лічбу агучылі падчас прэс-канфэрэнцыі ў дзяржаўным агенцтве БелТА, паведамляе «Свабода».

Намесніца старшыні камітэта адукацыі Мінскага гарвыканкама Ірына Чарняўская ўдакладніла, што гаворка прыкладна пра 4 тысячы дзяцей рознага ўзросту.

Паводле яе словў, у 5 сталічных гімназіях увесь працэс навучання цалкам арганізаваны на беларускай мове. У 10 сярэдніх школах такое навучанне адбываецца ў асобных класах.

«Усяго такіх класаў у Мінску 171. Гэта каля 4 тысяч дзяцей», — расказала чыноўніца.

Згодна з апошнімі апублікаванымі Белсатам звесткамі (за 2018-2019 навучальны год), у Мінску ў 278 школах вучыліся больш за 200 тысяч дзяцей.

Міністэрства адукацыі запэўнівае, што ў Беларусі падручнікі на роднай мове выдаюцца ў неабходнай колькасці на запыт устаноў адукацыі.

Бацькі ў суполках наракаюць на штучныя бар’еры з адкрыццём не тое што беларускіх школ, а асобных беларусамоўных класаў.