У Мінску судзяць чатырох журналістаў. Суддзя Касцян карае вялікімі штрафамі
Незалежных журналістаў Кацярыну Андрэеву (Бахвалаву), Сяргея Кавалёва, Алеся Сіліча і Марыю Арцыбашаву вінавацяць у незаконным вырабе прадукцыі СМІ — працы без акрэдытацыі на карысць тэлеканала «Белсат».
Фота Белсат
Вядома, што судзіць усіх чатырох журналістаў мусіць суддзя Ігар Касцян. Самі ж журналісты вырашылі не прыходзіць на пасяджэнні.
Суд пастанавіў разглядаць справу без іх, даследуюць пісьмовыя матэрыялы справы.
Cправы Кацярыны Андрэевай (Бахвалавай) і Сяргея Кавалёва разглядалі разам, паводле пратаколаў журналісты нібыта парушылі Закон аб СМІ, працавалі без акрэдытацыі.
У справе ёсць пратакол абследавання сайта тэлеканала "Белсат", якое праводзілася ў міліцыі. Агулам суд разглядаў чатыры эпізоды (па два ў кожнага з журналістаў). Гэта пратаколы за сюжэты пра Дзень незалежнасці і Дзень дэсантніка.
Аб'яўлены перапынак для вынясення рашэння суда. Паседжанне суда доўжылася 20 хвілін.
Кацярына Андрэева (Бахвалава) і Сяргей Кавалёў былі пакараныя штрафамі: кожны з іх мусіць сплаціць дзяржаве па 50 базавых велічынь (па 1 150 рублёў).
Міліцыянты вінавацяць карэспандэнтаў у парушэнні арт. 22.9 Кодэкса аб адміністрацыйных правапарушэннях, аднак ГА “Беларуская асацыяцыя журналістаў” ужо шмат гадоў настойвае на тым, што судзіць журналістаў і аператараў па гэтым артыкуле неправамерна.
Бо адказнасць за працу без акрэдытацыі ў Беларусі не прадугледжана. Нягледзячы на гэта, толькі сёлета журналістаў за супрацоўніцтва з “Белсатам” штрафавалі ўжо 30 разоў. Усе сённяшнія працэсы адбудуцца ў судзе Цэнтральнага раёна Мінска.
Кацярыну Андрэеву і Сяргея Кавалёва судзілі а 10 гадзіне.
Алеся Сіліча і Марыю Арцыбашаву будуць судзіць а 15 гадзіне.