У Міжнародным Чырвоным Крыжы заявілі, што не ведалі пра візіт лукашыста Шаўцова ў «ДНР»

Міжнародны камітэт Чырвонага Крыжа і Чырвонага Паўмесяца не ведаў і не ўдзельнічаў у арганізацыі візіту генеральнага сакратара беларускага Чырвонага Крыжа Дзмітрыя Шаўцова на Данбас. Пра гэта «Еўрарадыё» паведаміў афіцыйны прадстаўнік Міжнароднага камітэта Чырвонага Крыжа.

— У цяперашні момант мы разглядаем гэтае пытанне. Надзвычай важна, каб усе састаўныя часткі руху Чырвонага Крыжа і Чырвонага Паўмесяца захоўвалі сваю незалежнасць ад урадаў і носьбітаў зброі. Гэта дазваляе нам аказваць дапамогу бесстаронна, аддаючы прыярытэт тым, хто мае найбольшую патрэбу ў ёй, дзе б яны ні знаходзіліся, на якім бы баку лініі фронту яны ні былі.

МКЧК і МФЧК як міжнародныя падраздзяленні руху Чырвонага Крыжа і Чырвонага Паўмесяца падтрымліваюць нацыянальныя супольнасці ў іх прыхільнасці да нашых асноўных прынцыпаў. У выпадку ўзнікнення праблем МКЧК і МФЧК узаемадзейнічаюць на двухбаковай аснове з зацікаўленымі нацыянальнымі супольнасцямі, — сказаў прадстаўнік Міжнароднага Чырвонага Крыжа.

Генеральнага сакратара Беларускага Чырвонага Крыжа Дзмітрыя Шаўцова сфатаграфавалі падчас гуманітарнай паездкі на Данбас з Z-шаўронам. Фармальнай прычынай паездкі называюць перадачу гуманітарнай дапамогі. Літара Z ужо больш за год з'яўляецца сімвалам расійскай агрэсіі ва Украіне.

У беларускім Чырвоным Крыжы выданню адмовіліся каментаваць сітуацыю і паведамілі, што інфармацыя з'явіцца ў афіцыйных сетках арганізацыі.

Між тым статут Чырвонага Крыжа забараняе аддаваць перавагу якой-небудзь баку ў ваенных дзеяннях. Па каментар наўпрост да Шаўцова звярнулася «Люстэрка».

— Вы казалі, што ездзілі на Данбас. Гэта праўда? — удакладніў журналіст.

— Так, вядома. Толькі я зараз еду ў наступную камандзіроўку. Давайце мы з вамі сустрэнемся на наступным тыдні.

— Скажыце, а як суадносіцца ваш візіт і наяўнасць на вашай вопратцы расійскай праваеннай сімволікі са статутам БТЧК, у якім гаворыцца, што яна не аддае перавагі ні адной з бакоў падчас ваенных дзеянняў?

Пасля гэтага пытання Дзмітрый Шаўцоў паклаў слухаўку. Журналісты выдання прадублявалі яго тэкставым паведамленнем, але яно таксама засталося без адказу. У прэс-службе БЧК на запыт медыя таксама не адказалі.

З беларускім Чырвоным Крыжам звязана шмат скандалаў, бо ён трывала асацыюецца з рэжымам. Напрыклад, ад арганізацыі вылучалі чальцоў выбарчых камісій і назіральнікаў, хаця яна «па-за палітыкай». Нягледзячы на шматлікія скаргі, кіраўніцтва міжнароднага Чырвонага Крыжа не прымала ніякіх мер. Летась Дзмітрыя Шаўцова злавілі на гамафобных выказваннях.

Абвінавачванне ў ваенным злачынстве — арганізаваным і сістэматычным вывазе ўкраінскіх дзяцей — вельмі хвалюе Аляксандра Лукашэнку. «Лукашэнку ў Гаагу... За што?» — абураўся нядаўна ён на нарадзе.