Суд прызнаў намесніка гендырэктара БелАЗу Андрэя Дароніна вінаватым у атрыманні хабару (ч. 3 арт. 430 КК з ужываннем ч.1 арт. 69 КК) і прысудзіў 7,5 года пазбаўлення волі ў калоніі ўзмоцненага рэжыму з канфіскацыяй маёмасці.
Начальнік бюро ліставога металу і вядучы эканаміст у матэрыяльна-тэхнічным забеспячэньні бюро асуджаныя за атрыманне хабару на 6 гадоў пазбаўлення волі ў калоніі ўзмоцненага рэжыму з канфіскацыяй маёмасці. Суд таксама пастанавіў спагнаць з іх у даход дзяржавы 777 і 9320 рублёў «неабгрунтаванага ўзбагачэння» адпаведна.
За даванне хабару асуджаныя:
дырэктар у тэхнічных пытаньнях СТАА «ЗІКО-Зорка Групп» — на 5 гадоў абмежаваньня волі без накіраваньня ў папраўчую ўстанову,
дырэктар ТАА «Новастыль» — на 3 гады абмежаваньня волі, таксама без накіраваньня;
двое індывідуальных прадпрымальнікаў аштрафаваныя на 750 базавых велічыняў кожны.
Прысуд яшчэ не набыў моцы і можа быць абскарджаны.
4 ліпеня ў Менску пры атрыманьні хабару ў 1200 даляраў затрыманы намеснік гендырэктара БелАЗу Андрэй Даронін. Акрамя яго, затрымалі яшчэ пяцёх чалавек: начальнік бюро і эканаміст БелАЗу, якія бралі хабар, і тры прадстаўнікі камерцыйнай структуры, якія давалі хабар за станоўчае вырашэнне пытаньня аб падпісанні дамоваў на пастаўку металу.
Паводле праваахоўнікаў, незаконная схема дзейнічала з восені 2016 году. Метал для патрэб БелАЗа закупляўся па цэнах, якія перавышаюць рынкавыя. За гэта прадстаўнікі прадпрыемства сістэматычна атрымлівалі хабар, памер якога складаў пэўны адсотак ад сумы пагаднення.
