У «Бабулінай крынкі» зноў праблемы

 «Рассельгаснагляд» у чарговы раз з 25 чэрвеня ўвёў абмежаванні на пастаўку ў Расію малака і малочнай прадукцыі з чатырох беларускіх прадпрыемстваў. Забарона была ўведзена ў сувязі з «неаднаразовым выяўленнем антыбіётыкаў тэтрацыклінавай групы ў прадукцыі, якая паступіла ў Расію».

 «Рассельгаснагляд» у чарговы раз з 25 чэрвеня ўвёў абмежаванні на пастаўку ў Расію малака і малочнай прадукцыі з чатырох беларускіх прадпрыемстваў. Забарона была ўведзена ў сувязі з «неаднаразовым выяўленнем антыбіётыкаў тэтрацыклінавай групы ў прадукцыі, якая паступіла ў Расію».
У спіс прадпрыемстваў, прадукцыя якіх была забаронена для ўвозу ў Расію, трапілі «Барысаўскі малочны камбінат», «Асіповіцкі малочны камбінат», «Бярозаўскі сыраробны камбінат» і лідэр малочнай вытворчасці Магілёўскай вобласці — ААТ «Бабуліна крынка».
Ці былі аб’ектыўныя падставы ў расійскіх кантралёраў для ўводу забароны на ўвоз прадукцыі, у прыватнасці, «Бабулінай крынкі», — вялікае пытанне. Літаральна напярэдадні ўводу забароны на пастаўку прадукцыі ў Расію «Бабуліна крынка» атрымала сертыфікат якасці ад грамадскай установы LST Sert, акрэдытаванай пры Нацыянальным бюро Літоўскай рэспублікі, якая ўпаўнаважана Еўрасаюзам праводзіць аўдыт і выдаваць сертыфікаты адпаведнасці еўрапейскім патрабаванням якасці і бяспекі.
Аўдытары LST Sert прызналі, што жорсткім еўрапейскім патрабаванням якасці адпавядае ўвесь спектр прадукцыі кампаніі, заяўлены для сертыфікацыі: сухія малочныя прадукты, натуральнамалочная прадукцыя, масла сметанковае, марожанае, сыры паўцвёрдыя і цвёрдыя. У Рэспубліцы Беларусь ААТ «Бабуліна крынка» першай здолела атрымаць еўрапейскі сертыфікат на такі вялікі спіс прадукцыі.
Літаральна перад увядзеннем забароны на пастаўку малака ў Расію віцэ-прэм’ер Беларускага ўраду Андрэй Кабякоў падчас Пецярбургскага міжнароднага эканамічнага форума заявіў, што Беларусь не чакае новых супярэчнасцяў з Расіяй на малочным рынку. У прыватнасці, ён сказаў, што «перыяд узнікнення праблемаў» ужо прайшоў і дасягнутыя за апошні год дамоўленасці «даюць упэўненасць, што падобнага супрацьстаяння інтарэсаў ужо не будзе». Нічога не скажаш, «дакладны» прагноз.
Тым часам супрацоўнікі бялыніцкага філіяла ААТ «Бабуліна крынка» зараз знаходзяцца ў стане няўпэўненасці ў заўтрашнім дне, бо большая частка прадукцыі прадпрыемства раней ішла ў Расію. Сярод работнікаў прадпрыемства ходзяць чуткі, што цэх па вытворчасці сыроў можа прыпыніць сваю працу на некалькі месяцаў. Людзі добра памятаюць, як у мінулым годзе, падчас папярэдняй «малочнай вайны» з Расіяй, філіял некалькі месяцаў працаваў толькі ў якасці малакапрыёмнага пункта. Ужо зараз многія работнікі прадпрыемства адпраўлены ў адпачынак. Тым часам «старацелі», якія здабываюць сабе на пражыццё працай на сметніку каля вёскі Асавец, кажуць, што апошнім часам на звалку сталі вывозіць шмат сыра.

Багдан Іваноў