У Швейцарыі пачынаецца апеляцыйнае слуханне па справе Юрыя Гараўскага. «Новы Час» працуе з залы суда

 Сёння, 22 верасня, у Кантанальным судзе Санкт-Галена пачынаецца апеляцыйнае слуханне па справе былога байца беларускага САХРу Юрыя Гараўскага. У 2023 годзе суд першай інстанцыі апраўдаў яго па абвінавачаннях у датычнасці да гвалтоўных знікненняў беларускіх апанентаў улады. Карэспандэнт «Новага Часу» знаходзіцца ў залі суда і будзе расказваць, што адбываецца падчас слухання.

Гараўскі раней прызнаваўся ў датычнасці да выкрадання былога міністра ўнутраных спраў Беларусі Юрыя Захаранкі, а таксама Віктара Ганчара і Анатоля Красоўскага. Усе трое лічацца зніклымі без вестак, іх смерць афіцыйна не пацверджаная.

28 верасня 2023 года Роршахскі раённы суд Швейцарыі апраўдаў Гараўскага па абвінавачаннях у шматлікіх гвалтоўных знікненнях і альтэрнатыўным абвінавачанні ў перашкоджанні правасуддзю. Суд палічыў ягоныя паказанні недастаткова надзейнымі.

Прадстаўнікі пацярпелых абскардзілі гэтае рашэнне і дамагаюцца абвінаваўчага прысуду, пакарання за шматлікія гвалтоўныя знікненні, а таксама кампенсацыі выдаткаў на юрыдычную дапамогу. Абарона Гараўскага просіць адхіліць апеляцыю.

Першапачаткова апеляцыйнае слуханне павінна было адбыцца 24 чэрвеня, але яго перанеслі на нявызначаны тэрмін. Цяпер суд прызначыў яго на 22 верасня.

Праваабаронца Павел Сапелка, які назірае за працэсам, напярэдадні заявіў, што ён разлічвае на справядлівае рашэнне суда.

«Новы Час» сочыць за слуханнем з залы суда. Будзем паведамляць пра асноўныя падзеі і рашэнні суда.