У Брэсце адкрылася выстава пра агітацыю, прапаганду і ідэалогію (фота)

Выстава савецкіх і нацысцкіх газет часоў акупацыі праходзіць у фае Берасцейскага кінатэатру “Беларусь”, што месціцца на вуліцы Савецкай. Ініцыятарам экспазіцыі выступілі мясцовыя ідэолагі, а стэнды выставы пакідаюць неадназначныя ўражанні.



Кажа моладзевы лідар Зміцер Хведарук, які наведаў выставу:

— Увогуле ў звязку з падзеямі ва Украіне, у прыватнасці ў Крыме, тэма прапаганды, мне здаецца, надзвычай актуальная. Не ведаю, наколькі ідэалагічны аддзел адмыслова для гэтага зладзіў такую выставу, але ўражанне досыць цікавае. Было цікава параўнаць, пра што пісалі савецкія агітацыйныя матэрыялы, беларускія, на што звярталі ўвагу немцы, заклікаючы людзей удзельнічаць у іхніх фармаваннях.

Адметнасцю з’яўлецца тое, што каментары да інсталяцыяў зроблены па-беларуску. Апроч уласна гістарычных звестак, праводзяцца паралелі і з сучаснасцю. Напрыклад, адзін са стэндаў зазначае, што бел-чырвона-белы сцяг выкарыстоўваецца ў сваім ідэалагічных мэтах цяперашнімі супраціўнікамі існуючага дзяржаўнага ладу Беларусі.
 

Яўген Скрабец, Беларускае Радыё Рацыя

Фота аўтара