У мінскім Чырвоным касцёле памаліліся за ахвяр тэрактаў у Бруселі
23 сакавіка падчас ранішняй святой Імшы ў касцёле свв. Сымона і Алены ў Мінску памаліліся за ахвяр тэрактаў у Брусэлі.
Брусэль. Фота з Фэйсбука Alaksej Janukevich
Мінскія вернікі з парафіі Свв. Сымона і Алены ў знак салідарнасці з роднымі і блізкімі ахвяр тэрарыстычнага акту ў Бельгіі папрасілі Бога аб усіх неабходных дарах для душаў загінулых ад рук тэрарыстаў.
Нагадаем, што раніцай 22 сакавіка ў бельгійскім горадзе Брусель была здзейснена серыя тэрактаў. Некалькі выбухаў прагрымела ў аэрапорце Завентэм і метро.
Па афіцыйных даных, падчас тэрактаў загінула 34 чалавекі, дзясяткі атрымалі раненні рознай ступені складанасці. Адказнасць за тэракты ўзяла на сябе тэрарыстычная групоўка «Ісламская дзяржава».
