«Ударылі па твары, я ўпала з канапы». З’явіліся падрабязнасці аблавы ў мінскай арт-прасторы Hide

Уначы на 6 лістапада сілавікі прыйшлі на вечарынку мінскай арт-прасторы Hide і затрымалі аднаго з гасцей, распавялі «М*дыязоне» супрацоўнікі пляцоўкі. Цяпер становяцца вядомымі падрабязнасці здарэння.

Паводле слоў аднаго з відавочцаў, узброеныя сілавікі ўварваліся на вечарынку каля трох гадзін ночы і загадалі прысутным легчы тварам у падлогу.

«Больш за ўсё я ашалеў ад таго, што яны ўсе былі са зброяй. Вось гэта было вельмі страшна. Хто не клаўся, таго пі*дзілі. У майго знаёмага каля носа і на барадзе парэз. Хто паднімаў галаву, іх адразу апускалі. Кагосьці нагой, кагосьці па рэбрах маглі ламануць. Стаўленне было максімальна жудаснае», — распавёў ён.

Наведвальнікаў і супрацоўнікаў Hide, якія ляжалі на падлозе, абнюхаў міліцэйскі сабака, распавёў відавочца.

«Хадзіў чувак з вялікім пакетам, у ім нешта белае як у капсулах было. Амаль адразу, як сабака мінаў, людзей пачыналі аглядаць. Агляд адзення, тэлефона, заходзілі ў тэлеграм, у фота. Былі дзяўчаты, якія вельмі жорстка гарлапанілі і спрабавалі адстойваць свае правы», — успамінае ён.

Беларус здолеў дамагчыся адмены ў Барселоне канцэрта аматара Пуціна і Лукашэнкі

«Н*ша Ніва» таксама даведалася падрабязнасці здарэння.

«У 2:30 уварваўся АМАП, паклаў нас тварам у падлогу. Я была на другім паверсе, нас абнюхаў сабака. Дзяўчатам дазволілі сесці на канапу, я сядзела і пыталася, чаму нас да гэтага часу ўтрымліваюць, калі ў нас нічога няма. Прасіла паказаць пасведчанне, за што мяне ўдарылі па твары, я ўпала з канапы. Мне сказалі: «Дах*я разумная? Тады ляжы». Я ляжала на падлозе, мне выломлівалі рукі, нам не давалі хадзіць у туалет. Калі, нарэшце, пусцілі, мяне абшукалі аж да трусоў, лазілі ў тэлефоне. Адпусцілі мяне каля 5 раніцы, у клубе заставалася яшчэ шмат людзей, я не ведаю, ці забралі каго. Але гэта было жорстка», — распавяла відавочца.

Уначы на 6 лістапада сілавікі на вечарынцы мінскай арт-прасторы Hide затрымалі аднаго з гасцей.