Ужо праз месяц Польшча дабудуе плот на мяжы з Беларуссю

Плот на мяжы Польшчы і Беларусі дабудуюць да канца чэрвеня. Да гэтага ж тэрміну будзе пракладзена тэхнічная дарога ўздоўж агароджы. Электроннае абсталяванне будзе гатова ў верасні-кастрычніку. Пра гэта ў эфіры Polsat News заявіў начальнік Падляскага памежнага атрада генерал Анджэй Якубашак, перадае reform.news.

«Калі ўсё пойдзе па кантракце, то сістэма павінна быць гатовая на мяжы верасня-кастрычніка», — сказаў ён.

Па яго словах, падобныя бар'еры значна абцяжарваюць парушэнне мяжы. Ён адзначыў, што ўжо цяпер колькасць мігрантаў, якія спрабуюць перайсці мяжу, знізілася ў параўнанні з восенню мінулага года. Якубашак дадаў, што ў асноўным мігранты прыбываюць у Беларусь з Расіі. Па яго словах, іх шлях да мяжы займае каля тыдня. Польскія памежнікі лічаць, што непасрэдна на мяжы знаходзіцца некалькі сотняў мігрантаў, а ў Гродне — каля тысячы чалавек.

Нагадаем, Польшча будуе ўздоўж мяжы з Беларуссю 180-кіламетровую загароду. На астатніх участках мяжа праходзіць па рэках. Мяркуецца, што загарода будзе мець вышыню 5,5 метраў, а таксама драцяны навес. Акрамя таго, яе абсталююць камерамі і электроннымі датчыкамі, якія дазволяць фіксаваць набліжэнне да бар'ера.