«За размовы пра вірус можна трапіць у ШІЗА». Што адбываецца ў Бабруйскай калоніі

У Бабруйскай папраўчай калоніі № 2 — выбух каронавіруса. Атрад закрылі на каранцін, забароненыя спатканні, а за распаўсюд інфармацыі пра хворых вязняў чакаюць пакаранні ад адміністрацыі, піша belsat.eu.

Інфармацыю збіраюць па крупінках

Аб тым, што ў Бабруйскай ПК №2 з’явіўся каронавірус, сваякі асуджаных даведаліся ў 20-х чыслах траўня і ледзь выпадкова. Жонка аднаго з асуджаных прыгадвае, што першыя падазрэнні пачаліся, калі ў суполцы калоніі «Вконтакте» пачалі пісаць аб адсутнасці званкоў ад сваякоў і агульных падазрэннях.
«Калі мне патэлефанаваў муж, то я не стала чакаць, пакуль ён нешта скажа. Але ў люб заявіла, што ўсё ведаю пра інфекцыю. Ён проста пацвердзіў мае апасенні», — гаворыць жанчына.
Яна кажа, што падрабязнасцяў ніхто не ведае.
«Гаварыць аб гэтым забаронена, можна патрапіць у ШЫЗА. Інфармацыю складаем з розных паведамленняў у суполцы «Вконтакте» і Viber», — кажа яна.

Гэтую інфармацыю пацвярджае і былы палітвязень Дзмітрый Паліенка. Ён 2 гады адсядзеў у Бабруйскай калоніі, і цяпер падтрымлівае сувязі з некаторымі вязнямі. Ён кажа, што вязні ў калоніі запалоханыя.
«Усю інфармацыю сваякам пра каронавірус яны гавораць толькі па тэлефоне. Нават падчас спатканняў праз Skype сказаць нічога не могуць, бо за імі сочыць адміністрацыя», — наракае ён.
Паводле крыніцы «Белсату», два атрады, самыя аддаленыя, расфармавалі і выкарыстоўваюць як каранцінныя. Гэта значыць, што людзі там не працуюць, а проста сядзяць па бараках. Туды пераводзяць не толькі хворых, але і так званыя кантакты 1-га і 2-га ўзроўню.

Вірус прынёс медпрацаўнік

Сваякі асуджаных кажуць, што вірус прынеслі медпрацаўнікі. Аднак агульнай карціны вязні не ведаюць. Адміністрацыя не дае аніякай інфармацыі, што толькі параджае новыя плёткі. У тым ліку аб смерці. Але жонка вязня мяркуе, што гэта няпраўда. «Калі б сваякі даведаліся, што з іхнымі блізкімі нешта такое адбылося, то аніхто не стаў бы маўчаць!» — упэўненая яна.
Дзмітрый Паліенка кажа, што ў калоніі шмат хварэюць на пнеўманію. Аднак нават невядома, ці робяць камусьці тэсты. Матулям, якія тэлефануюць у калонію, каб даведацца, што адбываецца з іхнымі дзецьмі, адказваюць: «Усё добра».
Па словах Дзмітрыя Паліенкі, цяпер у калоніі, апроч каранціннага атраду, робяць дэзынфекцыі і прыборкі. Вязні шыюць маскі і абаронныя касцюмы.

«Дзяржава хавае любую інфармацыю аб COVID-19 у калоніях»

Сусветная арганізацыя аховы здароўя раней заяўляла, што людзі, якія знаходзяцца ў вязніцах, найбольш уразлівыя перад COVID-19. У месцах несвабоды практычна няма асабістай прасторы, таму вірус вельмі хутка распаўсюджваецца.

Праваабаронца Сяргей Усцінаў лічыць, што дзяржава хавае любую інфармацыю аб COVID-19 у папраўчых калоніях. Не распавядаюць нават аб захадах прафілактыкі.
«Шмат выпадкаў, калі людзям у папраўчых калоніях і раней не аказвалі пэўную медычную дапамогу і тыя паміралі. А што казаць аб каронавірусе, які распаўсюджваецца вар’яцкімі тэмпамі. Калі памножыць гэта на любоў дзяржаўных органаў хаваць рэальную статыстыку, то маштабы эпідэміі ў пенітэнцыярных установах могуць быць жудаснымі», — кажа ён.
Цяпер у калоніях забароненыя сустрэчы са сваякамі. Сяргей Усцінаў мяркуе, што гэта — адэкватны захад. Тэлефонныя званкі дазволеныя, але часта гэта выкарыстоўваецца супраць вязняў.
«А гэта — непрымальна», — адзначае праваабаронца.
Карэспандэнту «Белсату» не ўдалося звязацца з адміністрацыяй калоніі і атрымаць каментар наконт сітуацыі — 2 дні запар адказнай асобы не было на месцы.
Паводле Ксеніі Тарасевіч, belsat.eu