Затрымалі жонку зняволенага Арцёма Анішчука (абноўлена)
Як стала вядома праваабаронцам, у Мінску супрацоўнікі ГУБАЗіКа затрымалі на працы Вольгу Анішчук — жонку асуджанага фігуранта справы «пяцёркі, якая пашкодзіла машыну супрацоўніка ДВП Аляксандра Гейца». Вядома, што яе павезлі ў будынак ГУБАЗіКа на вуліцы Рэвалюцыйнай.
Вольга Анішчук, фота Дзмітрыя Дзмітрыева
Раніцай яна паведаміла, што ёй тэлефанаваў следчы з Магілёва і хацеў, каб яна дала паказанні супраць Арцёма: «Сказаў нібыта за абразу ў сетцы інтэрнэт». Па словах следчага, Вольга праходзіць сведкай па справе.
Раней Арцём заяўляў пра катаванні і збіццё ў Магілёўскай ПК-15, супраць яго заводзілі крымінальную справу па арт. 411 Крымінальнага кодэкса (злоснае непадпарадкаванне патрабаванням адміністрацыі папраўчай установы). Па фактах публікацыях у інтэрнэце ў адносінах да Вольгі праводзілася праверка па артыкуле за паклёп на начальніка калоніі №15.
Арцёма ў верасні перавялі ў бабруйскую калонію №2. Нядаўна стала вядома, што супраць яго ўзбудзілі крымінальную справу па арт. 369 Крымінальнага кодэкса — за абразу міліцыянта ў закрытым тэлеграм-чаце да яго затрымання. Па гэтаму факту як сведку дапытвалі яшчэ аднаго фігуранта справы «пяцёркі» Паўла Сахарчука.
Абноўлена: супрацоўнікі ГУБАЗіКа правялі ператрус у кватэры Анішчукоў у сувязі з узбуджанай супраць Арцёма крымінальнай справы па арт. 369 Крымінальнага кодэкса (абраза міліцыянта).
Дома вынялі стары тэлефон Арцёма, які больш за года ўтрымліваецца за кратамі, і тэлефон Вольгі.
Пасля допыту жанчыну адпусцілі на волю.