Жыхару Бабруйска замянілі «хімію» на калонію за абразу Лукашэнкі

25 жніўня суд Бабруйска і Бабруйскага раёна прызнаў 31-гадовага Рамана Стацэвіча вінаватым у «публічнай абразе прэзідэнта». Суддзя Антон Дудаль прысудзіў яму два гады «хіміі», нягледзячы на тое, што пракурорка Ірына Хадневіч прасіла пазбавіць яго волі на год, распавядае «Вясна».

Згодна з абвінавачаннем, мужчына ў размове ў відэачаце «наўмысна абразіў Лукашэнку з выкарыстаннем ненарматыўнай лексікі».

Размову ў відэачаце запісаў і выклаў былы міліцыянт Канюшык — ён лічыць, што «дапамагае АУС выкрываць асоб, якія пышыраюць ідэі падарваць аўтарытэт прадстаўнікоў ўлады і ідэю ўтварэння хаасу і хваляванняў у нашай Рэспубліцы Беларусь».

Як стала вядома, пракурорка Хадневіч была не згодная з рашэннем суддзі і настойвала на сваім пакаранні. У канцы верасня Раман атрымаў пракурорскі пратэст.

Сёння, 9 лістапада, у судзе Магілёўскай вобласці судовай калегіяй у складзе суддзяў Мазурава, Гладкага і Кічыгіна Стацэвічу ўзмацнілі жорсткасць пакарання — замест двух гадоў «хіміі» мужчыне давядзецца правесці год у калоніі.