28 сакавіка — Міхась Скобла з лекцыяй "Голас і логас Рыгора Барадуліна"
28 сакавіка ў межах цыкла "Гораду і Свету" адбудзецца лекцыю, прысвечаная Рыгору Барадуліну. Выдатны лектар, паэт і літаратуразнаўца Міхась Скобла назваў яе так; "Голас і логас Рыгора Барадуліна". Лекцыя адбудзецца а 18.30 у галерэі "Ў". Шчыра запрашаем далучыцца да падзеі.
Беларусі ён дадзены як бы навырост. Чытаючы і спасцігаючы яго, мы будзем расці — і духоўна, і нацыянальна.
Міхась Скобла: “Не шкодзіла б заснаваць цэлы Інстытут Барадуліназнаўства”
Рыгор Барадулін… Паэт міласцю Божай, “да-стваральнік свету”, філосаф… Ацэнены прыжыццёва — як чытачамі, так і афіцыйнымі ўладамі ў пачатку 90-х, народны паэт- не паводле наданага звання, а паводле прызнання. Вельмі трапна пра “народнасць” і “беларускасць” Барадуліна сказаў Міхась Скобла ў згаданым вышэй інтэрв’ю: “Барадулінская паэзія акумулявала ў сабе і беларускую мудрасць, і беларускую дабрыню, і беларускі досціп. Усё наша шматпраяўнае беларускае быццё адлюстравалася ў ёй, і глядзім мы з радасным здзіўленнем на тое адлюстраванне: а мы, аказваецца, і цікавыя, і самадастатковыя, і нябедныя, і хадзіць нам у пазыкі да чужога дзядзькі не варта”.
Але - па-за ўсімі ацэнкамі і ўсхваленнямі — наколькі ж сапраўды беларусы ведаюць свайго паэта — як асобу, як творцу, наколькі разумеюць глыбіню і сутнасць ягонага слова?
28 сакавіка ў межах цыкла “UrbietOrbi”, які ладзяць Лятучы ўніверсітэт і Міжнародны кансорцыум “ЕўраБеларусь”, паэт, эсэіст, перакладчык, вядучы аўтарскай праграмы “Вольная студыя” на Радыё Свабода Міхась Скобла выступіць з прамовай “Голас і Логас Рыгора Барадуліна”. У сваёй прамове з чатырма лірычнымі адступленнямі лектар плануе спыніцца на пяці аспектах:
— Паэт-(да)стваральнік cвету: дэміургавасць Барадуліна
— Вітаізм барадулінскай паэзіі
— Культ Маці (Маці Куліна і Маці Радзіма)
— Творчасць як чысцец Мовы
— Феномен паэта-перакладчыка
Лекцыя адбудзецца 28 сакавіка ў галерэі Ў, пачатак а 18.30. Уваход вольны! Арганізатары забяспечваюцьonline-трансляцыю: http://fly-uni.org/urbi-et-orbi