Алесь Дзянісаў прэзентаваў песню на вершы Алеся Чобата (аўдыё)
Вакаліст гурту Dzieciuki Алесь Дзянісаў прэзентуе на Tuzin.fm песню «Калі над лугам бусел праляцеў» з свайго сольнага праекту на вершы Алеся Чобата.
Самотнік на гэтую песню папярэднічае выхаду акустычнага альбому, які Алесь Дзянісаў запісаў на словы сляпога паэта са Скідзелю. Праца над ім ужо скончана. Канцэпцыя яго вельмі простая – толькі голас і гітара. Аднак, песню «Калі над лугам бусел праляцеў» Алесь запісаў пры дапамозе музыкаў з гурту Race Of Dreamers. Дар’я Багаслова запісала тут флейту, сапелку, клавішы, варган, і бэк-вакал, а Зміцер «Трэш» Брытанаў – бубны, бас, варган і бэк-вакал. Песня была запісаная на студыі Race Of Dreamers. Майстэрынг зрабіў Андрэй «Кактус» Лабадзін (Deep Cold Ocean)
«Песня атрымалася прыгожай, шмат у чым дзякуючы аранжыроўцы Дашы і Змітра. А што да словаў Алеся Чобата да гэтай песні і да ўсіх астатніх, то тут магу адзначыць толькі, што лічу гэта геніяльнай паэзіяй. Канкрэтна ў гэтым вершы я адчуў прадчуванне вайны…», – зазначыў Алесь з нагоды прэзентацыі песні на Tuzin.fm. Усяго для альбому на вершы Чобата запісаныя 24 творы. «Калі над лугам бусел праляцеў» будзе прысутнічаць на дыску двойчы – у акустычным варыянце і ў гэтай версіі.