«Без білета» правялі сваю музычную фітнэс-размінку ў парку 900-годдзя Мінску (фотарэпартаж)
З нагоды святкавання афіцыйнага Дня незалежнасці парк ля «Чыжоўка-арэны» ператварыўся ў канцэртную сцэну на «Вялікія выходныя» — фестываль летняй музыкі. Мы завіталі сюды ў апошні, але самы насычаны дзень, 5 ліпеня. У нядзелю ўдзел прынялі гурты «U.G.OSLAVIA», «Огонёк Бэнд» і хэдлайнер фэсту — «Без білета».
Першы гурт грае даволі вясёлую і энергічную музыку ў стылі поп-рока і рок-н-рола. Увесь выступ салістка калектыву не стаяла на месцы і добра разагравала наведвальнікаў. Дарэчы, на фестываль акрамя моладзі прыходзілі цэлымі сем'ямі ды сталых людзей было нямала. Не так часта ў Мінску праходзяць фестывалі з добрай музыкаю і вольным уваходам.
U.G.OSLAVIA
Пасля выступу «югаславаў» гледачы пачалі выкрыкваць «Без білета», і ўжо падыходзіў іх час па праграме, але на сцэну выйшаў кавер-гурт «Огонёк Бэнд». Калектыў робіць перапевы на вядомыя кампазіцыі ў зусім іншым выкананні ды спявае свае песні. Музычны накірунак можна вызначыць ад ска-рока да шансона. Калі любіце былых «Ляпісаў» да альбому «Манифест», то гурт павінен спадабацца.
«Огонёк Бэнд»
Пасля «Огонёк Бэнд», са спазненнем больш за гадзіну паводле праграмы, на сцэну выйшлі «безбілетнікі» — адзін з самых вядомых беларускіх поп-рок гуртоў. Па традыцыі, саліст Віталь Артыст павітаўся з імправізаваным танцпляцам і трыбунамі, калі можна так назваць бакавыя сядзячыя месцы. А далей распачалася фінтэс-размінка пад музыку гурта, якой кіраваў фронтмен калектыву. Артыст па чарзе розным «сектарам» казаў, якую руку ці нагу трэба падымаць, на танцпляцы ўсё атрымалася сінхронна і прыгожа. Падчас усяго выступу захавалася цёплая атмасфера, і наведвальнікі не хацелі развітвацца з гуртом. Агульна выступ працягваўся паўтары гадзіны.
«Без білета»