Больш ніколі

У франкамоўным (ды ня толькі) музычным сьвеце адбылася значная падзея — зьявіўся новы сынгл францускай караліцы поп-музыкі Мілен Фармэр з сумнява-аптымістычным пасланьнем «Больш ніколі» (À tout jamais). Сынгл папярэднічае новаму альбому, які зьявіцца да канца 2022 году.

Такім парадкам, пасьля некалькі год маўчаньня француская зорка вяртаецца з новым альбомам і, у дадатак, з новым турнэ «Nevermore» у 2023 годзе. У новым альбоме Мілен Фармэр задзейнічаныя іншыя славутыя музычныя зоркі: Woodkid, AaRON, Moby.

Вайна ва Ўкраіне прывяла да таго, што музыка анулявала канцэрты ў Расеі, дзе традыцыйна яе вельмі шануюць і чакаюць. Стрыманая і сакрэтная Фармэр дасюль не выказалася наконт вайны, але паездку ў Расею анулявала. На крытыку маўчаньня зоркі з нагоды вайны ейныя агенты высказаліся коратка: «Сьпявачка ня словам, а справай выказала сваю пазыцыю».

Новы сынгл «Больш ніколі» апускае нас у вядомы тужлівы сьвет сьпявачкі, якая ўпарта супрацьстаіць гвалтоўнаму сьвету і абдорвае слухацтва аптымізмам і ўпэўненасьцю. Не зважаючы на сучасную барбарыю: шал кавіду і вайны, распачатай Расеяй, спробу забойства ейнага добрага сябра Салмана Рушдзі, Мілен Фармэр знаходзіць сілы да творчасьці, якой яна цягам 38 год падбадзёрвае мільёны сваіх слухачоў.

Вядома, тэксты да сваіх кампазыцыяў сьпявачка піша сама. Яна лічыцца вельмі субтыльнай, часта ўпадніцкай, але ж усё гуманісцкай паэткай. І гэтым разам словы песьні ўражваюць і дораць спадзеў, што больш ніколі набліжэньне да катастрофы не паўторыцца. Сьпявачка стамілася ад «гульні масак і звыклых выбачэньняў людзей», якіх катастрафічна не дастаткова цяпер, і сьмела праклінае барбарыю, пасылаючы ўсіх ейных дэманаў у пекла, праўда, да гэтага паслаўшы іх груба па-ангельску куды падалей. Хоць і шакаваная сьпявачка гвалтам сьвету, які прывёў да таго, што «роднасныя душы згубілі сэрца», усе ж яна аптымістычна завяршае кампазыцыю: «Я больш не баюся, хіба толькі застаецца ванітны спазм».

Цікава, што назва самотніка Мілен Фармэр «Больш ніколі» так натуральна кладзецца на Беларусь апошніх двух гадоў: пасьля 2020 году мы таксама жывем з думкай, марай і дэвізам «Больш ніколі». Разам з сьпявачкай хочацца верыць у гэтае «больш ніколі» і ў бліжэйшы час мець сілы ўсё пачаць нанава.