Самыя натхняльныя і жыццёвыя: кнігі пра рак, якія даюць надзею

Страшны дыягназ можа перакрэсліць усе мары і планы, але ёсць мноства прыкладаў, калі людзі збіраліся з сіламі і перамагалі хваробу. Пра такія гісторыі пішуць кнігі — і некаторыя вы, хутчэй за ўсё, ведаеце.

Сярод бясконцай колькасці гісторый пра жыццё асабліва адгукаюцца гісторыі пра людзей, якія сутыкнуліся з ракам і знайшлі ў сабе сілы жыць далей. Кнігі пра рак апісваюць не толькі боль і страх, але і  неверагодную мужнасць, каханне, іскру надзеі, якая ззяе нават у самыя змрочныя хвіліны.

«PALATNO» — пра кнігі, якія варта прачытаць.

«Цар усіх хвароб. Біяграфія раку» («The Emperor of All Maladies»)

Аўтар: Сідхартха Мукхерджы

Кніга дакументуе гісторыю даследавання анкалагічных захворванняў: ад іх першага апісання да сучасных метадаў лячэння. Гэтая кніга стала магутным даследаваннем раку як хваробы і як феномену, які ўплывае на чалавецтва. Асноўныя тэмы ў кнізе закранаюць гісторыю анкалогіі, метады яе лячэння і як сучасныя дактары змагаюцца з хваробай.

Кнігу напісаў амерыканскі анколаг Сідхартха Мукхерджы, які атрымаў Пулітцэраўскую прэмію за твор у 2011 годзе. «The Emperor of All Maladies» лічыцца адной з найбольш важных кніг пра рак.

Фэнтэзі, прыгоды, антыўтопіі і нават дзіцячая літаратура. Што пачытаць летам?

«Апошняя лекцыя» («The Last Lecture»)

Аўтар: Рэндзі Паўш

У 2007 годзе прафесар Рэндзі Паўш, у якога дыягнаставалі рак падстраўнікавай залозы ў апошняй стадыі, прачытаў лекцыю ва ўніверсітэце Карнэгі-Мэлан. Лекцыя называлася «Сапраўднае дасягненне мары вашага дзяцінства», яна была часткай з серыі лекцый вядомых навукоўцаў, калі іх просяць выступіць з апошняй гіпатэтычнай лекцыяй.

Лекцыя Рэндзі Паўша была запісаная і выкладзеныя ў YouTube і стала віруснай. І, вядома, яна выйшла ў выглядзе кнігі. Паўшу дапамагаў пісаць кнігу журналіст Джэфры Заслаў.

У кнізе аўтар расказвае пра свае дзіцячыя мары і тое, як ён працаваў над іх здзяйсненнем. Адна з ключавых тэм — як трэба ставіцца да цяжкасцей і перашкод, што сустракаюцца на шляху да мары. Паўш называе гэтыя перашкоды «цаглянымі сценамі», якія існуюць для таго, каб аддзяліць тых, хто сапраўды хоча чаго-небудзь дасягнуць, ад тых, хто не гатовы прыкласці дастаткова намаганняў. Паўш ведаў пра смяротны дыягназ, таму вялікая частка кнігі прысвечаная разважанням пра спадчыну.

Кніга натхняе на тое, што жыць трэба на поўную моц, нягледзячы на абставіны.

«Ракавы корпус» («Cancer Ward»)

Аўтар: Аляксандр Салжаніцын

Раман Салжаніцына быў часткова заснаваны на асабістым досведзе: пісьменнік сам перанёс рак і праходзіў лячэнне ў савецкай бальніцы. Раман пісаўся падчас «хрушчоўскай адлігі», калі цэнзура ў Савецкім Саюзе была крыху слабейшай, але яго выданне ў СССР забаранілі. Кніга выйшла толькі ў 1968 годзе на Захадзе.

Падзеі ў рамане адбываюцца ў сярэдзіне 1950-х гадоў у аддаленай савецкай анкалагічнай клініцы, куды паступаюць пацыенты з рознымі стадыямі і формамі раку. Галоўным героем з’яўляецца былы дысідэнт і зэк Алег Костаглотаў, які пасля вызвалення з ГУЛАГа трапляе ў шпіталь з цяжкай формай анкалагічнага захворвання. Ён сутыкаецца не толькі з фізічнай барацьбой за жыццё, але і з псіхалагічнымі і маральнымі выпрабаваннямі.

Беларускія кнігі ў замежжы — дзе можна набыць?

У гэтым спісе «Ракавы корпус» — адзіная кніга, дзе рак выкарыстоўваецца як метафара. Для Салжаніцына рак — гэта савецкі таталітарны рэжым, які раз’ядае людзей і грамадства знутры. Пацыенты ў «Ракавым корпусе» прадстаўляюць розныя слаі савецкага грамадства, іх стаўленне да хваробы і лячэння часта адлюстроўваюць іх жыццёвыя погляды і стаўленне да сістэмы.

«Вінаватыя зоркі» («The Fault in Our Stars»)

Аўтар: Джон Грын

Кніга амерыканскага пісьменніка Джона Грына была апублікаваная ў 2012 годзе і адразу стала бестсэлерам. Ужо праз два гады раман адаптавалі і знялі па ім паспяховы фільм.

Гэта гісторыя пра двух падлеткаў — Хэйзэл і Агастуса. Яны змагаюцца з ракам, знаходзяць каханне і падтрымку адно ў адным. Хэйзэл і Агастус захапляюцца кнігай, у якой няма канцоўкі, але дзяўчына вельмі хоча даведацца, што адбылося з персанажамі пасля апошняй старонкі. Агастус ладзіць для Хэйзэл паездку ў Амстэрдам да аўтара кнігі, каб яна знайшла адказы на свае пытанні.

Гэта адначасова кранальная і захапляльная кніга пра жыццё, хваробу і надзею. Раман стаў папулярным сярод падлеткаў і дарослых. Твор Джона Грына высока ацанілі крытыкі за шчыры падыход да складанай тэмы.

«Беларускі чытач цэніць якасную літаратуру». Топ-5 кніг — лідараў продажаў у «Кнігаўцы»

«Я, Эрл і дзяўчына, якая памірае» («Me and Earl and the Dying Girl»)

Аўтар: Джэсі Эндрус

Раман амерыканца Джэсі Эндруса стаў для яго дэбютным. Як і папярэдняя кніга «Вінаватыя зоркі», кнігу «Я, Эрл і дзяўчына, якая памірае» таксама экранізавалі.

У кнізе галоўным героем выступае старшакласнік Грэг Грэйнс, які імкнецца заставацца незаўважаным у школе, каб пазбегнуць праблем. Адзіны сябар Грэга — Эрл, з якім яны здымаюць аматарскія парадыйныя фільмы. Усё змяняецца, калі маці Грэга прымушае яго сябраваць з аднакласніцай, у якой дыягнаставалі лейкемію. Паміж Грэгам, Рэйчал і Эрлам завязваецца сапраўднае сяброўства, а хлопцы вырашаюць у гонар дзяўчыны зняць кіно.