Канадскі прафесар прадказаў, як доўга пратрымаецца Лукашэнка

Дэвід Марплз, спецыяліст па пытаннях Беларусі, Украіны і Расіі, які працуе ў Універсітэце Альберты ў Эдмантане (Канада), спрагназаваў, як доўга Лукашэнка застанецца ва ўладзе.

«Я думаю, гэта справа месяцаў, - сказаў Марплз. - Я сумняваюся, што ён пратрымаецца ва ўладзе цэлы год. Таму што падмурак яго ўлады паступова знікае. Эканоміка хістаецца. Няма народнай падтрымкі; сённяшняя народная падтрымка значна слабейшая, чым яна была, скажам, 9 жнiўня, а 9 жніўня яна была значна слабейшая, чым яна была трыма месяцамі раней. Яго папулярнасць зніжаецца ўвесь час. І нягледзячы на ​​ўсе тыя заключэнні [пратэстуючых пад варту], катаванні і збіццё, людзі абсалютна цвёрда перакананыя, што сістэма павінна змяніцца, і яны поўныя рашучасці працягваць барацьбу. Гэта важны фактар, калі людзі вырашылі не здавацца.
Людзям мільгануў праменьчык надзеі, што яны могуць узяць уладу самі, і гэта быў для іх выдатны момант. Зараз становіцца ўсё цямней - цямней, чым было калі-небудзь за апошнія 26 гадоў, і тым не менш людзі бачаць дарогу перад сабой. Лукашэнку ўжо дакладна няма чаго прапанаваць людзям. Ён цяпер як голы кароль. Так, ён можа заставацца ва ўладзе, пакуль лаяльнымі застаюцца ваенныя, сілавікі, КДБ. Калі, аднак, з'явяцца першыя знакі нелаяльнасці сярод гэтых груп, ён сыдзе імгненна. І гэта можа здарыцца даволі хутка».
Таксама Дэвід Марплз выключыў магчымасць дыялогу паміж Лукашэнкам і Каардынацыйнай радай. Прафесар распавёў аб інтэрв'ю, якое ён правёў з Веранікай Цапкала. Са слоў Марплза, яна патлумачыла, што першапачаткова мэта КР заключалася ў тым, што яны паставяцца да Лукашэнкі з павагай і дазволяць яму сысці як першаму прэзідэнту Беларусі, але сітуацыя моцна змянілася.
kyky.org