Расійскі эксперт: Каб перакрыць транзіт газу, Лукашэнка павінен адабраць трубу ў «Газпрама»

Каб спыніць транзіт газу, беларускія ўлады павінны ўзяць пад кантроль ўчастак газаправода «Ямал — Еўропа», які належыць «Газпраму». Так пракаментаваў пагрозы Аляксандра Лукашэнкі прэзідэнт Саюза нафтагазапрамыслоўцаў Расіі Генадзь Шмаль, перадае выданне «Секрет фирмы».

Калі транзіт перакрыць, Масква не зможа выконваць свае абавязацельствы перад еўрапейскімі кліентамі, патлумачыў ён.

«Нават размоў ні аб якім перакрыцці транзіту быць не павінна. Гэта дае падставу еўрапейцам думаць: «Ага, вы нягеглыя пастаўшчыкі, выкарыстоўваеце экспарт газу ў палітычных мэтах». Хіба нам гэта трэба? Вядома, не. Таму, я лічу, заява Лукашэнкі няправільная і не павінна быць падтрымана ні кіраўніцтвам "Газпрама", ні кіраўніцтвам краіны ў цэлым», — растлумачыў Шмаль.

Лукашэнка сёння прыгразіў Еўропе перакрыццём паставак газу па трубаправодзе «Ямал — Еўропа» ў адказ на пяты пакет санкцый, які можа быць абвешчаны ў бліжэйшыя тыдні. Асаблівую незадаволенасць Лукашэнкі выклікала прапанова Польшчы закрыць пункты пропуску на мяжы ў адказ на міграцыйны крызіс.

Паводле reform.by.