Рух «За Свабоду» асудзіў напад РФ на караблі ў Керчанскім праліве

Рух «За Свабоду» лічыць, што Беларусі неабходна тэрмінова выйсці з ваенных саюзаў з Расіяй і вывесці расійскія ваенныя аб'екты з тэрыторыі краіны.



Плакат на Дзень Волі ў Мінску. Фота www.racyja.com

Плакат на Дзень Волі ў Мінску. Фота www.racyja.com

Рух «За Свабоду» патрабуе перагледзіць ваенныя адносіны з Расіяй пасля нападу расійскіх ваенна-марскіх сілаў на ўкраінскія караблі ў Керчанскім праліве.

«Насуперак Статуту ААН і Канвенцыі ААН па марскім праве яе караблі парушылі свабоду навігацыі ў Керчанскім праліве і ўжылі сілу ў дачыненні да караблёў Украіны, што прывяло да праліцця крыві. Гэтымі дзеяннямі Расійская Федэрацыя зноў прадэманстравала сваю агрэсіўную сутнасць», — адзначылі ў арганізацыі.

Рух «За Свабоду» рашуча асуджае гэтыя неправамерныя дзеянні Масквы, якія, на думку арганізацыі, «сведчаць пра існаванне рэальнай пагрозы незалежнасці і тэрытарыяльнай цэласнасці ўсіх суседзяў Расіі, у тым ліку і нашай дзяржавы».

«Мы патрабуем ад беларускіх ўладаў кардынальна перагледзець усе адносіны з РФ у вайсковай галіне і забяспечыць выкананне канстытуцыйнага палажэння аб нейтралітэце Рэспублікі Беларусь», — адзначылі аўтары заявы.

Так, лічаць у Руху «За Свабоду», Беларусі неабходна тэрмінова выйсці з ваенных саюзаў з Расіяй і вывесці расійскія ваенныя аб'екты з тэрыторыі краіны.

Для гарантавання інфармацыйнай бяспекі дзяржавы Рух патрабуе «абмежаваць вяшчанне Расійскіх сродкаў масавай прапаганды на тэрыторыі Беларусі».

Паводле pyx.by