Святлана Ціханоўская перадала ўкраінскім дэпутатам просьбы беларускай дыяспары

Святлана Ціханоўская правяла анлайн-сустрэчу з прадстаўнікамі міжфракцыйнага аб'яднання Вярхоўнай рады Украіны «За дэмакратычную Беларусь», у якую ўваходзяць дэпутаты партый «Слуга народа», «Еўрапейская салідарнасць», «Голас», а старшынёй МФА З'яўляецца Аляксей Ганчарэнка.

Як паведамляе reform.by, шэраг пытанняў датычыўся беларусаў, якія вымушана пакінулі радзіму. Лідар дэмсіл перадала просьбы беларускай дыяспары ва Украіне, з якой напярэдадні правяла спецыяльны званок.

Ціханоўская звярнула ўвагу на тэмы, якія лічыць важнымі:

не дазволіць рэжыму пасварыць Беларусь і Украіну;

спыніць супрацоўніцтва СБУ, МУС і офіса генпракурора Украіны з Беларуссю;

увесці для тых, хто быў вымушаны выехаць ва Украіну, статус часовай абароны, прадугледжаны Законам Украіны «Аб бежанцах і асобах, якія маюць патрэбу ў дадатковай або часовай абароне»;

часова выключыць адміністрацыйную адказнасць для тых, хто быў вымушаны перасякаць мяжу Украіны за межамі пунктаў пропуску, калі яны плануюць выехаць у іншую краіну;

пайсці на сустрэчу ў пытанні апастыляў на дакументах, паколькі для многіх рэлакантаў небяспечна вяртацца ў Беларусь або звяртацца ў амбасаду;

падтрымаць грамадскія арганізацыі і медыя, якія працягваюць працу ў выгнанні, — ім патрэбна дапамога ў рэгістрацыі аб'яднанняў і юрыдычных асоб.

Ціханоўская падзякавала дэпутатам за падтрымку беларусаў і актыўную працу МФА па прасоўванні беларускага пытання, агучыла пазіцыі па пагрозе ваеннага канфлікту і прапанавала далейшыя шляхі супрацоўніцтва. 

Украінскія дэпутаты падкрэслілі, што чакаюць ад сваёй краіны далучэння да санкцый ЕС і абмеркавалі з Ціханоўскай пытанне аб стварэнні групы падтрымкі Беларусі ў ПАРЕ. Яны прапанавалі ініцыяваць слуханне ці сустрэчу на тэму Беларусі падчас красавіцкай сесіі ПАРЕ і запрасіць туды Святлану Ціханоўскую.